ଘୋଡା ମୁହାଁ

ଦିନେ ଜେଜେ ବାପା ହୋଇଲେ ଯେ ଖପା

ଲାଠି ଧରି ବାହାରିଲେ

ଦୁର୍ଭାଗ୍ୟ ବେଳରେ ଘୋଡା ମୁହାଁ ଜନ୍ମି

କ୍ରୋଧ ଦୁଇ ଗୁଣ କଲେ ।

ନମାନିଲେ ଗୁରୁ ଭାବି ମହା ଦାରୁ

ଯେସନେ ମାନ ଗୋବିନ୍ଦ

ଭାଷା ନବୁଝନ୍ତି କଥାକୁ ଚାଟନ୍ତି

ପକଟେ ଗୁଞ୍ଜିଲେ ଚାନ୍ଦ ।

ଟାଉଟର ପଣ ତନୁ ଆଭୂଷଣ

ଫେସନ ମାଙ୍କଡ ମୁହଁ

ଅଧା ଚିରା ଫଟା କେତେ ଯେ ରଫ ଟା

କାହାକୁ କହିବ କୁହ ।

ଗାଡି ଖଣ୍ଡେ ଚଢି ମାରି ଘଡ ଘଡି

ଚଳିଲା ସତେ କି ରେଳ

କିଏ ପୁଣି ଭାବେ ଯାଏ ଭାନୁ ରାଜ୍ୟେ

ବୁଡିଲା ଯେସନେ ବେଳ ।

ସ୍ତନ୍ୟ ପାନ ଦେଇ ମାତା ବଡ଼ କଲା

ଭାବି ସେ ଭବିଷ୍ୟ ନିଧି

ଛୋଟ ଡେଣା ଟାରେ ପର ଲାଗି ଗଲା

ବୁଲନ୍ତି ଯେ ଗଳି କନ୍ଦି ।

ଦାଣ୍ଡରେ ହାଟରେ ଝିଅ ବୋହୁ ଦେଖି

ସିଟି ବୋଝ ଦେଲେ ଝାଡି

ଘୋଡା ମୁହାଁ ବୋଲି ଜେଜେ ଗାଳି ଦେଇ

ଲାଠି ଧରି ଦେଲେ ତଡି ।

ଉଦ୍ଧତ ସନ୍ତାନ ହେଲେ ବଦନାମ

ନରଖିଲେ ପିତା ଟେକ

ଏପରି କୁପୁତ୍ର କୋଳକୁ କଳଙ୍କ

ମାଗି ଖାଅ ପଛେ ଭିକ ।