ଏତିକି ମାଗୁଣି ମୋର
ଏତିକି ମାଗୁଣି ମୋର
ଛୋଟ କଢିଟିଏ କରି ଗଢ଼ି ଅଛ
ମୋତେ ହେ ପରମେଶ୍ବର
ରଙ୍ଗ ସୁରଭିକୁ ମେଲାଇ ମହକୁ
ମୋ ଜୀବନ ନିରନ୍ତର
ଏତିକି ମାଗୁଣି ମୋର
ମୋ ଚଉପାଶକୁ ମହକାଇବାକୁ
ଲୟ ଥାଉ ଶ୍ରୀପୟର ।
ଭଲ ମଣିଷରେ ଗଣିତ ହେବାକୁ
ପ୍ରେରଣା ଉତ୍ସାହ ଭର
ଦୁଖୀରଙ୍କୀ ପାଇଁ ହୃଦ କାନ୍ଦୁଥାଉ
ମତି ଆନ ଉପକାର
ଏତିକି ମାଗୁଣି ମୋର
ସେବା ଜୀବନର ଶ୍ରେଷ୍ଠ ବ୍ରତ ହେଉ
ନଥାଉ ପର ଅପର ।
ସତ ପଥେ ଚାଲି ସତ କର୍ମ କରି
ସଭିଙ୍କୁ ଭାବି ନିଜର
ଆପଣାପଣରେ ଛନ୍ଦି ରଖିବାକୁ
ମନ ଥାଉ ପରିଷ୍କାର
ଏତିକି ମାଗୁଣି ମୋର
ସଦ୍ଭାବନା ତୋଳି ଭ୍ରାତୃତ୍ବ ପ୍ରୀତିରେ
ବିଶ୍ବ ହେଉ ପରିବାର ।
ସକଳ ମନରୁ ଅମା ଅନ୍ଧକାର
କରି ଦେବା ପାଇଁ ଦୂର
ଦୀପକଟେ ସାଜି ଜଳି ରହିବାକୁ
ହୃଦୟକୁ ଦୃଢ଼ କର
ଏତିକି ମାଗୁଣି ମୋର
ସେଥିପାଇଁ ଯେତେ ଜ୍ଞାନ-ଧନ ଲୋଡ଼ା
ମୋହଠାରେ ଦାନ କର ।
ଛନ୍ଦ କପଟତା ଈର୍ଷା ଦ୍ବେଷ ହିଂସା
କରି ମନୁ ପରିହାର
ସୁନ୍ଦର ସୃଷ୍ଟିକୁ ସୁନ୍ଦରତା ଗୁଣେ
ଦେଖୁଥାଏ ନିରନ୍ତର
ଏତିକି ମାଗୁଣି ମୋର
ସୁଢ଼ଳ ସରଳ ଶାନ୍ତ ସ୍ବଭାବ
ବେଶରେ ଦିଶେ ସୁନ୍ଦର ।
ଗୁରୁଜନେ ଭକ୍ତି ଲଘୁଜନେ ପ୍ରୀତି
ଜୀବଠି ଦୟା ଆଦର
ବିପଦ ସଂକଟ ପଥେ ଉଭା ହେଲେ
ମନରେ ନଥାଉ ଡର
ଏତିକି ମାଗୁଣି ମୋର
ସହନଶୀଳତା ଗୁଣରେ ପ୍ରଭୁ ହେ
ମୋତେ ଧରିତ୍ରୀଟେ କର ।
ଅନ୍ୟାୟ ଅନୀତି ଭ୍ରଷ୍ଟାଚାର ଯେତେ
ଅଛି ହୃଦୟେ ଯାହାର
ଗଢ଼ି ଦିଅ ମୋତେ ମହୌଷଧି ସାଜି
କରିବାକୁ ଉପଚାର
ଏତିକି ମାଗୁଣି ମୋର
ବିନୀତ ରହିବି ତୁମ ପଦ୍ମପାଦେ
ହେ ପ୍ରଭୁ ଜଗଦୀଶ୍ବର ।
ସପନକୁ ସଦା ପୂରା କରିବାକୁ
ସାଧନାରେ ଆଗୁସାର
ମୋର ପ୍ରସ୍ଫୁଟିତ ରୂପେ ଆକର୍ଷିତ
ରହୁ ନୟନ ଆନର
ଏତିକି ମାଗୁଣି ମୋର
ଶୁଭାଶିଷ ଢାଳି ପୂରାଇ ଅଞ୍ଜଳି
ଜନମ ସାର୍ଥକ କର ।