ଏମିତି ଏକ ବିବାହ

ବିବାହର ସବୁ ପରମ୍ପରା ଭୁଲି

      ମନର ମିଳନ ହେଲା ବୋଲି

ନିଃସଙ୍ଗ ପଥରେ ଦୁହେଁ ଦୁହିଁଙ୍କୁ

      ‌‌‌ଆପଣେଇ ନେଇ ଗଲେ ଚାଲି ।

କଟକଣା ସବୁ ପଛେ ରହିଗଲା

      ରହି ଗଲା ସବୁ ରୀତିନୀତି

ପ୍ରେମର ପୁଲକ ଖେଳିଲା ଜୀବନେ

      ପୁନେଇଁ ଲାଗିଲା ପ୍ରତି ରାତି ।

ନବବଧୂ ଓଠେ ଲାଜ ମିଶା ହସ

      ନେଲାତ ସବୁରି ମନ ଜିଣି

ପ୍ରତିଟି ମୂହୁର୍ତ୍ତ ଖୁସିର ସମ୍ଭାର

      ଆଣି ଥିଲା ସତେ ଅବା କିଣି ।

ଭାବର ବନ୍ଧନ ବଡ଼ ମନେ ହେଲା

      ବାକି ଯାହା ଥିଲା ପଛ କଥା

ଜାତି ଧର୍ମ ଆଉ ପରମ୍ପରା ଏବେ

      ଦେଉ ବି ନଥିଲା ମନେ ବ୍ୟଥା ।

ସ୍ମୃତି ବିଜଡ଼ିତ ମଧୁର ମୂହୁର୍ତ୍ତ

       ମନର ଆକାଶେ ଇନ୍ଦ୍ରଧନୁ 

ଆନ୍ଦୋଳିତ କରେ ନୂଆ ଜୀବନକୁ

       ଭୁଲି କେ ପାରିଛି ଏଇ ମନୁ ।