ଦୁର୍ଲଭ ଜନମ
ଦୁର୍ଲଭ ଜନମ
କେହି ନ ଜାଣଇ କେତେ ଜନ୍ମ ପରେ
ପାଇଛି ମରତେ ଦୁର୍ଲଭ ଜନ୍ମ
ଆଚାରବିଚାର ମହକେ ମହକି
ଶ୍ରେଷ୍ଠ ପ୍ରାଣୀ ହେବା ନୁହେଁ କି ଧର୍ମ ?
ଯାହା ଦୁର୍ମୂଲ୍ୟ ଦୁଷ୍ପ୍ରାପ୍ୟ ତାହା
ପାଇବାକୁ କେତେ କର୍ମ ସାଧନା
କରିବାକୁ ପଡେ ମାନବ ଜାତିକୁ
ଏକଥାକୁ ବି ସେ ବୁଝି ବୁଝେନା ।
ମାନବର ମତି ଗତି ସୁପଥରେ
ଆଗେଇଲେ ସିନା କର୍ମ ସାର୍ଥକ
କୁଚିନ୍ତା ମନକୁ ଆବୋରି ଧରିଲେ
ହେବ ନାହିଁ କି ସତ୍ପଥ ବାଧକ ।
କରମ ଜୀବନ କର୍ମ ଭଗବାନ
ଏକଥାଟି ନିତି ମନରେ ହେଜି
ଚିତ୍ତ ପ୍ରବୃତ୍ତିର ଶୋଧନରେ ସିନା
ସେପରି କରମେ ପାରିବା ମଜ୍ଜି ।
ଏଥିରୁ ବିଚ୍ୟୁତ ହୋଇଗଲେ କେହି
ସୁଫଳ ନ ପାଏ କେବେ ଜୀବନେ
ସେଥିପାଇଁ ନିଜ ଚେତନା ଜଗାଇ
ଦଶେନ୍ଦ୍ରିୟ ରଖ ନିଜ ଅଧୀନେ ।