ଧୂପ ଅବକାଶ
ଧୂପ ଅବକାଶ
ତିନି ଧୂପ ତାଙ୍କ ପାଞ୍ଚ ଅବକାଶ
ଜାଣିଛ କି ପ୍ରିୟତମା
ଶ୍ରୀକ୍ଷେତ୍ରେ ଆମର କାଳିଆ ଠାକୁର
କିଏ ବର୍ଣ୍ଣିବ ଉପମା ।
ବେଶ ସ୍ନାନ ତାଙ୍କ ଚାଲିଥାଏ ନିତି
ଭକ୍ତଙ୍କୁ ଦେଖିବା ମନା
ଅବକାଶେ ପ୍ରଭୁ ଆନନ୍ଦ ନିଅନ୍ତି
ଶ୍ରୀଅଙ୍ଗ ସେବକେ ଜଣା।
ପ୍ରଥମ ଧୂପରେ ତିନି ଅବକାଶ
ନିତି କରିଥାନ୍ତି ପ୍ରଭୁ
ରୀତି ନୀତି ତାଙ୍କ କେତେ ଚାଲିଥାଏ
ସେବକେ କରନ୍ତି ସବୁ ।
ଅତି ପ୍ରତ୍ୟୁଷରେ ମଙ୍ଗଳ ଆଳତି
ପ୍ରଭାତର ଅବକାଶ
ଦାନ୍ତଘସା ସ୍ନାନ ବେଶ ତାଡପରେ
ହୋଇଥାଏ ସବୁ ଶେଷ ।
ସକଳ ଧୂପରେ ବଲ୍ଲଭ ନୈବେଦ୍ୟ
ଉଲାଗି ପ୍ରଥମ ବେଶ
ଦ୍ୱିତୀୟ ବେଶରେ ନୂଆ ଅବକାଶ
ରାଜଭୋଗେ ହୁଏ ଶେଷ ।
ଦ୍ୱିତୀୟ ବେଶର ଉଲାଗି ହୋଇଲେ
ତୃତୀୟ କରେ ପ୍ରବେଶ
ଭୋଗ ମଣ୍ଡପର ନୈବେଦ୍ୟ ଅର୍ପଣେ
ହୋଇଥାଏ ତାଙ୍କ ଶେଷ ।
ଦିପହରର ଦ୍ୱିତୀୟ ଧୂପରେ
ଭକ୍ତେ ଗହଳି ଚହଳି
ଭୋଗ ନୈବେଦ୍ୟର ଅର୍ପଣ ଶେଷରେ
ପହଡେ ଭାଙ୍ଗେ ଗହଳି ।
ତୃତୀୟ ଧୂପରେ ସନ୍ଧ୍ୟା ଆଳତିରେ
ଭକ୍ତଙ୍କ ହୁଏ ପ୍ରବେଶ
ଗୋଧନ ବାହୁଡା଼ ଅବା ଟେରାଫିଟା
ଚତୁର୍ଥର ଅବକାଶ ।
ସଞ୍ଜ ଧୂପ ପରେ ଶେଷ ଅବକାଶ
ବଡ଼ ସିଂହାରର ବେଶ
ଭୋଗ ନୈବେଦ୍ୟର ଶେଷ ପ୍ରହରରେ
ପ୍ରଭୁଙ୍କ ନିଦ୍ରା ପ୍ରବେଶ ।
ତିନି ଧୂପେ ପୂଜା ଷୋଡଶୋ ପଚାର
ଧୂପ ଦୀପାଳିକୁ ଦେଇ
ପାଞ୍ଚ ଅବକାଶେ ପୂଜା ପାଞ୍ଚୋପଚାର
ପୁଷ୍ପ ସମର୍ପଣ ଦେଇ ।
ଧନ୍ୟ ଧନ୍ୟ ଆମ କାଳିଆ ସାଆନ୍ତ
ଧୂପ ଅବକାଶେ ପାଲା
ପ୍ରତି ଧୂପେ ଥରେ ଦେଖା ଦେଇଥାଅ
ସାହାଣ କରିକି ମେଲା।