ଦେଶ ପ୍ରେମୀ

ବଇରୀ ଆଖିରୁ ନିଦ ହଜିଯାଏ

     ତୁମ ରଣନୀତି ପାରେନି ବୁଝି

  ଟାଣପଣ ତାର ଚୁନା କରିଦିଅ

    ଜୀବନକୁ ତୁମ ଲଗାଇ ବାଜି...

ଆକାଶ ହେଉକି ଅଥଳ ସାଗର

    ମାଟି ହେଉ ଆବା ହିମ ଶିଖର  

  ବଇରୀର ଛାତି ଥରାଇ ଦିଏରେ 

    ତୁମ ରଣଭେରୀ ରଣ ହୁଙ୍କାର

  ସୀମା ସେପରିରେ ପ୍ରଳୟ ରଚରେ

    ଆତଙ୍କବାଦୀଙ୍କ ଶିବିର ଖୋଜି....  

ମାଟିରେ ଗରଜେ କମାଣ ତୁମର

   ଆକାଶ ଛାତିରୁ ଫୁଟାଅ ବୋମା

ଅଥଳ ଜଳରେ ତୁମ ନଉଭେଳା

    ଚମକାଇ ଦିଏ ଭୂମିରୁ ଭୂମା

 ନିତି ଲେଖ ତୁମେ ନୂଆ ଇତିହାସ

    ତ୍ରିରଙ୍ଗାରେ ସାରା ଦୁନିଆ ସାଜି ....

ବରଫ ଶେଯରେ ବିତିଯାଏ ତୁମ

   କେତେ ଯେ ବିନିଦ୍ର ହେମାଳ ରାତି

ମରୁରେ ମରୁରେ ବିଷମ ଗ୍ରୀଷମ

   ଝଡ ଝଞ୍ଜାକୁ ତ ନଥାଏ ଭୀତି

ଦୂରୁଗମ ପଥେ ତୁମେ ଚାଲୁଥାଅ

  ଆମେ ଯାଉ ସୁଖ ସପନେ ହଜି ....

ଭାରତବାସୀଙ୍କ ଗର୍ବ ତୁମେ ବୀର

   ସଲାମ୍ କରୁଛୁ ନୁଆଁଇ ମଥା

ଭାରତ ମାତାର ସୁଯୋଗ୍ୟ ସନ୍ତାନ

  ଗଉରବେ ଭରା ତୁମରି ଗାଥା

ସେହି ବୀର ଗାଥା ଗାଇଗାଇ ଆମେ

ଦେଶ ପ୍ରେମ ଦୀପ ଦେବୁରେ ତେଜି....