ଚକୁଳିଆପଣ୍ଡା ଗୀତ (ଛାଡ଼ଖାଇ)
ଚକୁଳିଆପଣ୍ଡା ଗୀତ (ଛାଡ଼ଖାଇ)
ଧରମ ମାସଟି ଭଲେଭଲେ ଗଲା ଭାଇ
ଭଲ ବାର ପଡ଼ି ଅଛି ଆଜି ଛାଡ଼ ଖାଇ l
ପୁଜି ଦାମୋଦର ପଢ଼ି ଗୀତା ଭାଗବତ
ପଞ୍ଚୁକ ପାଳିଲୁ ସାଥେ ଏକାଦଶୀ ବ୍ରତ l
ରାଇ ଦାମୋଦର ବ୍ରତ ପୂଜା ନାରାୟଣ
କାର୍ତ୍ତିକ ମାସେ କରିଲୁ ପୁଣ୍ୟ ଅରଜନ l
କଥା ରହିଅଛି ବକେ ନ ଖାଆନ୍ତି ଆମିଷ
ଆମିଷ ଖାଇବ କିଆଁ ବୁଦ୍ଧିଆ ମନୁଷ୍ୟ l
ମାସଟା ଯାକ ଦାନ୍ତରେ ତୁଳାକୁ ଲଗାଇ
ପାଟି ଆମ୍ବିଳ ହେଇଛି ହବିଷ୍ୟାନ୍ନ ଖାଇ l
ବାରଟା ପଡ଼ିଛି ଆଜି ଭଲେ ବୁଧ ବାର
କୁକୁଡ଼ା,କଙ୍କଡ଼ା,ଛେଳି ନଯିବେ ନିସ୍ତାର l
ଏମନ୍ତେ ବିଚାରି ହବିଷ୍ୟାଳି ଧର୍ମ ଅର୍ଥୀ
ଥଳି ଧରି ବଜାରକୁ ଖରେ କଲେ ଗତି l
ଏକାଳେ ଧରମ ବାଣୀ ହେଲା ଶୁଣଶୁଣ
କାର୍ତ୍ତିକେ କରିଲ ଯେତେ ପୁଣ୍ୟ ଅରଜନ l
ବାରବର୍ଷ ତପ ଯିବ ଶୁଖୁଆ ପୋଡ଼ାରେ
ପଡ଼ିବଟି ଯାଇ ସର୍ବେ ରୋୖରଵ ନର୍କରେ l
ଗରମତେଲ କଡ଼ାରେ ପଡ଼ି ଭଜା ହେବ
ଶୁଖୁଆ ପୋଡ଼ି ଖାଇବା ମଜା ଛାଡ଼ିଯିବ l
କାର୍ତ୍ତିକ ଯାଇଛି ମାର୍ଗଶୀର ସୁରୁ ହେଲା
ଆମିଷ ନ ଛୁଇଁ, ପୂଜ ପଦ୍ମିନୀ, କମଳା l
ଆମିଷ ଛୁଇଁଲେ ବାବୁ ଲକ୍ଷ୍ମୀଛଡ଼ା ହେବ
ବାର ଦ୍ୱାରେ ବୁଲୁଥିଲେ ଭିକ୍ଷା ନମିଳିବ l
ଲକ୍ଷ୍ମୀ ପୁରାଣର କଥା ଶୁଣିଥିବେ ମାଆ
କିଦଶା ହେଲା ଠାକୁର ଜଗା ଓ ବଳିଆ l
ଧର୍ମବାଣୀ ବୋଲି ଗାଇ ଚକୁଳିଆ ପଣ୍ଡା
ଭିକ୍ଷାଦିଅ ମାଆ ଏବେ ତାତିଲାଣି ହଣ୍ଡା l
ପଣ୍ଡା ପୁଅ ଥଣ୍ଡା କଥା ମନେ ରଖିଥାଅ
ଦୟା ରଖି ଥିବେ ପ୍ରଭୁ କରୁଣା ଆଳୟ l