ଚିନ୍ତିତ ମହାଲକ୍ଷ୍ମୀ
ଚିନ୍ତିତ ମହାଲକ୍ଷ୍ମୀ
ମହାଲକ୍ଷ୍ମୀ ବୋଲୁଛନ୍ତି ଶୁଣ ବିମଳେଇ
ପ୍ରଭୁ ମୋହର କଥାକୁ କର୍ଣ୍ଣ ଦେଲେନାହିଁ l
ବିଷମ ଗ୍ରୀଷମେ ପ୍ରଭୁ ହୋଇ ବିଳିବିଳି
ଚନ୍ଦନକେଳି କରିଲେ ନରେନ୍ଦ୍ରରେ ବୁଲି l
ଆସି ସ୍ନାହାନ କରିଲେ ସୁନା କୂଅ ପାଣି
ଶହେଆଠ ଗରା ଭଗ୍ନୀ ରଖିଥାଅ ଜାଣି l
ଶୋଇଛନ୍ତି ଏବେ ବୁଢ଼ାକମ୍ବଳ ଘୋଡ଼େଇ
ଶହେ ଛଅ ଜ୍ବରେ ଦେହ ଫୁଟୁଅଛି ଖଇ l
ଆଠଦିନ ହେଲା ନାଥେ ନଖାଆନ୍ତି କିଛି
ଭଉଣୀ କି କରିବି ମୋ ମୁଣ୍ଡ ବୁଲାଉଛି l
ବିମଳା ବୋଇଲେ ତହୁଁ ଶୁଣ ଠାକୁରାଣୀ
ବ୍ରଜପୁରୁ ଡାକିଆଣ ଗୋପୀ ଡାକ୍ତରାଣୀ l
ପୁରୁଣା ଘିଅ ଠେକିଏ ସଙ୍ଗେ ଆଣିଥିବେ
ଅଦା,ଶୁଣ୍ଠୀ,ପିପ୍ପଳୀରେ ଓଷୁଅ କରିବେ l
ନିଶୁଆ ତେଲିର ଘରୁ ଫୁଲରୀର ତେଲ
ମାଲିଶହୋଇବେ ପ୍ରଭୁ ବଇଦରେ ଗେଲ l
ବଳଙ୍ଗାରୁ ଘେନି ଆସ ଭେଜି ବାଇଗଣ
ଭାଜି ଖୁଆଇଲେ ଯିବ ଅରୁଚିଆ ପଣ l
ଖାଇବାକୁ ଦେବ ଖାଲି ଘିଅର ଖେଚୁଡ଼ି
ଦୁଇଦିନେ ପ୍ରଭୁ ବସି ଯିବେ ଅଣ୍ଟା ଭିଡ଼ି l
ଅଣସର ପଣା ପାନୀୟ ତାଙ୍କୁ କରି ଦେବ
ଚୁଆ, ଚନ୍ଦନ, କର୍ପୁରେ ବାସ ଛୁଟୁଥିବ l
ଦଇତାପତିଙ୍କୁ ଆଜ୍ଞା ଦେବ ସିନ୍ଧୁ ଜେମା
ଘଷା,ମାଲିଶରେ ହେଳା କରିବେନି ଜମା l
ହଉଲୋ ଭଉଣୀ ତୋର କଥା ମୁଁ କରିବି
ପ୍ରଭୁ ସୁସ୍ଥ ହେଲେ ହର ଗଉରୀ ପୂଜିବି l
କେତକୀ, ଅରଖ ପୁଷ୍ପେ ପୁଜି ପଞ୍ଚାନନ
ବ୍ରାହ୍ମଣଙ୍କୁ ଦେବି ନିଶ୍ଚେ ସୁମିଷ୍ଟ ଭୋଜନ l
ଭକ୍ତଙ୍କୁ ତୋଷିବି ମୁହିଁ ଛପନ ଭୋଗରେ
ରାଧାଦାମୋଦର ହରି ହରେକୃଷ୍ଣ ହରେ l