ଚିକୁ ର ଜନ୍ମଦିନ

ଆସୁଛି ଜନ୍ମଦିନ ପାଖେଇ

  ଖୁସିରେ ନାଚୁଛି ଚିକୁ,

 କେତେ ଦିନ ଆଉ ରହିଲା ବାକି

  ପଚାରେ ଖାଲି ମାଆକୁ ।

ଭାବୁଛି ଆଣିବ ଜିନ୍ସ ପ୍ୟାଣ୍ଟ୍

   ସାଙ୍ଗକୁ ନାଲି ସାର୍ଟ୍,

ଡାକିବ ସବୁ ସାଙ୍ଗ ସାଥିଙ୍କୁ

   ଆସିବ ବଡ଼ କେକ୍ ।

ମାଆଙ୍କୁ କୁହେ ରନ୍ଧିବୁ ତୁହି

   ସୁଆଦିଆ ମଣ୍ଡା ପିଠା,

ବାପାଙ୍କୁ କୁହେ ଆଣିବ ତୁମେ

   ବଜାରୁ କଣ୍ଢେଇ ମିଠା ।

ଭାଇଙ୍କୁ କୁହେ ଆଣିବ ତୁମେ

   ଭଳିକି ଭଳି ବେଲୁନ୍,

ଜନ୍ମଦିନ ଆସୁଛି ପରା

  ଚାଲ ଯିବା ଟିକେ ସେଲୁନ୍ ।

ଘରେ ଆମ ଭୋଜି ହେବ

  ଆସିବେ ମାମୁଁ ମାଇଁ ,

ଆଣିବେ ପରା ବଡ଼ ଗାଡ଼ିଟେ

 ମୋହରି ଖେଳିବା ପାଇଁ ।

ଡାକିବି ମୋର ସାଙ୍ଗମାନଙ୍କୁ

  ଆସିବ ସବୁ ତୁମେ,

ଜନ୍ମଦିନ ଉତ୍ସବରେ ମୋ ଯୋଗ ଦେବ

 ରହିବନି ବ୍ୟସ୍ତ କେଉଁ କାମେ ।

ନୂଆ ଡ୍ରେସ୍ ପିନ୍ଧି ବୁଲି ଆସିବି

  ପାଖ ପଡୋଶୀ ଘରେ,

ପାଦ ଛୁଇଁ ପ୍ରଣାମ କରିବି

  ଆଉ କିଛି ଲୋଡା ନାହିଁ ମୋରେ ।

ଭାଇ ନେଇଯିବ ମନ୍ଦିର ମତେ

  କରିବି ଜଗା ଦର୍ଶନ,

ମାଆ ମୋର କହିଛି ପରା

 ଜଗା ଆଶୀର୍ବାଦ ସର୍ବପ୍ରଥମ ।

ରାତିରେ ଆସିବେ ସାଙ୍ଗ ସବୁ

  ଘର ସଜ୍ଜା ହୋଇବ,

କେକ୍ କଟା ପରେ ପରେ

 ନାଚ ଗୀତର ଆସର ଜମିବ ।

ସାଙ୍ଗରେ ସବୁ ଆଣିଥିବେ

   ଭଳିକି ଭଳି ଉପହାର,

ଭୋଜି ଖାଇ ସଭିଏଁ ଯିବେ

  ଖାଲି ହୋଇଯିବ ଘର ।