ଚେରାପୁଞ୍ଜି ଭ୍ରମଣ

ମେଘର ରାଇଜ ମେଘ ଆଳୟ

    ମେଘାଳୟ ମେଘଦୂତ ଆଶ୍ରୟ l

ହିମାଳୟ ଜେମା ହଇମବତୀ

    ହିମ ଶୈଳେ ଯହିଁ କ୍ରିଡ଼ନ୍ତି ନିତି l

ସର୍ପିଳ ପଥରେ ପାହାଡ଼େ ଚଢ଼ି

    ଝୁଲି ଝୁଲି ଚାଲେ ମଟର ଗାଡ଼ି l

କାହିଁ ରାଜ ପଥ କାହିଁ ସୁଢ଼ଙ୍ଗ

    ପଥ କାଟି ଚାଲେ ଯନ୍ତ୍ରଦାନଵ l

ପାର୍ଶ୍ୱେ ଉଚ୍ଚ ଉଚ୍ଚ ମଥା ଉଠାଇ

    ବୃକ୍ଷେ ଡାକୁଛନ୍ତି ବାଟୋଇଭାଇ l

ଉଞ୍ଚା ପରବତେ କୁଞ୍ଚି କୁଞ୍ଚିକା

     ଉଚ୍ଚ ମେଘ ଯାଏ ଘୁଞ୍ଚି ଘୁଞ୍ଚିକା l

ଧଳା ମେଘ ଖଣ୍ଡ ଶୈଳ ମୁକୁଟ

     କାହିଁ ରାବ ପୁଣି ବନ୍ୟ କୁକ୍କୁଟ l

ମନମଧ୍ୟେ ମୋର କଳ୍ପନା ଯାଗେ

   କ୍ଷୀରାବ୍ଧି ଫେନ କି ଶ୍ରୀବିଷ୍ଣୁ ଅଙ୍ଗେ l

ଉଚ୍ଚ ହିମାଳୟେ ଶଇଳ ଶ୍ରେଣୀ

    ଝର, ଝର, ଝରେ ଝରଣା ପାଣି l

ନିର୍ଝରିଣୀ ପାତେ ଝଟିକା କଣୁ

   ମନୋରମ ଶୋଭା ନ ଯିବ ମନୁ l

ଠାବେ ଠାବେ ପୁଣି ଶକ୍ର କାର୍ମୁକ

      ଅଜଗବ ଧନୁ ହର ସାୟକ l

ଘୋର ବଜ୍ରନାଦ ବରଷା ଧାରା

   କେବେ ପଡ଼େ ପୁଣି ନରମ ଖରା l

ମେଘ ମାଳା ମଧ୍ୟୁ ମୁହଁଟି କାଢ଼ି

      ସବିତା ଦିଅନ୍ତି କିରଣ ଝାଡ଼ି l

ଚେରାପୁଞ୍ଜି ପୁଞ୍ଜ ଶୋଭା ନିକୁଞ୍ଜ

   ଶୋଭା ତା ବର୍ଣ୍ଣନେ ସମର୍ଥ ଭଞ୍ଜ l

ଅବା ପଲ୍ଲୀ କବି ନନ୍ଦ କିଶୋର

    ଗଙ୍ଗାଧର, ରାଧା ଶବ୍ଦ ସମ୍ଭାର l

ଘୋର ବର୍ଷା ସଞ୍ଜ ଆସିଲା ମାଡ଼ି

   ଲେଉଟାଣି ଗଡ଼େ ମଟର ଗାଡ଼ି l

ଧନ୍ୟ ସୃଷ୍ଟି କର୍ତ୍ତା ସୃଷ୍ଟି ତୁମ୍ଭର

    ବନ୍ଦନା କରେ ମୁଁ କଞ୍ଜ ପୟର ।