ବୟସ ଖସିଲା

ବୟସ ଖସିଲା ମାଦକତା ଗଲା

       ସରି ସରି ଆସେ ଦିନ 

ପଛ କଥା ଆଉ ନ ଭାବି ମନରେ

       ଚିନ୍ତେ ତୋ ଚକାନୟନ।

ଯଉବନ କାଳେ ମଦ ମତ୍ତ ହୋଇ

        କରୁଥିଲି ହେୟ ଜ୍ଞାନ

ସେ ସବୁ ହେଲାଣି ମୋ ପାଇଁ ଅତୀତ

        ତୁମ ଠାରେ ନିତି ଧ୍ୟାନ।

କରିଥିବା କର୍ମ ପ୍ରାୟଶ୍ଚିତ ରୂପେ

        ଭୋଗୁଅଛି ତାର ଫଳ

ନୀଳ କନ୍ଦର ରେ ତୁ ପରା କାଳିଆ

         ଦେଉ ଥାରେ ମୋତେ ବଳ।

ଜାଣି ସାରିଲିଣି ମରଣ ସୂଚନା

        ତୋ ନାମ ହେଉଛି ଗୁଣି

ତଥାପି ମନରେ ଆଶା ରଖିଅଛି

         ପାର ହେବି ତରଙ୍ଗିଣୀ।

ମୋ ଆଖିର ଲୁହ ହୃଦୟ ବେଦନା

        କରିଦେଲି ସମର୍ପଣ

ସଜ ହେଉଥିବ ମୋ ପ୍ରାଣର ଆତ୍ମା

        ତୋ ପାଖରେ ହେବ ଲୀନ।