ଲାଇବ୍ରେରୀ
ପ୍ରୋଫାଇଲ୍
ବୁଢ଼ାବୁଢ଼ୀକେ ରଖବ କିଏ ?
ବୁଢ଼ାବୁଢ଼ୀକେ ରଖବ କିଏ ?
1 min
366
ଜମିବାଡ଼ି ଲାଗି ଭେଇ ଭେଇ
ଦିନେ ଲାଗ୍ଲେ ଗାଲି ଝକର୍
ଗାଁ ପାଂଚ୍ ଲୁକ୍କୁ ଡାକିକରି
କର୍ଲେ ହୋ ଇତାର୍ ବତର୍
ସୁନା ଗହନା ଥିଲା ଜେତ୍କି
ଥୁଇ ଦେଲେ ସମାନ୍ ସମାନ୍
ଗାର୍ କାଟିଦେଲେ ଘରେସବୁ
ଭାଗ୍ ଭାଗ୍ରେ ନିଜର୍ ଠାନ୍
ଗାଇ ଦାମୁର୍ ଦଅଁରା ଜୁତା
କିଛି ବି ଘାଏ ବାଦ୍ ନି ଯାଉଁ,
ଘରର୍ ଇଜ୍ଜତ୍ ବାହାରେ ହୋ
ଉଖୁଲା ପଛେରେ ହେଇଯାଉଁ
ପାଖେଥନ୍ ବୁଢ଼ାବୁଢ଼ୀ ବସି
ତାକର୍ କଥା କିଏ ପଚାରେ
ଘାଏଗଲେ ହୋ ପଡ୍ବା ପାଲି
ରଖ୍ବେ ବାହାରର୍ ଦୁଆରେ
ଶେଷେ ବୁଢ଼ାବୁଢ଼ୀର୍ ଭାଗ୍କେ
କାହାରିକର୍ ମନ୍କେ ନାଇଁ
କିଏ ରଖ୍ବା ଅଚଲ୍ ଦରବ
ସାନି ହେଉଥିବେ ଯାହିତାହିଁ
ଇଥିର୍ ଲାଗି ବଡ୍ କର୍ଲେ
ଛୁଆ କର୍ବାରେ ଭାଗ୍ଭାଗ୍,
ଛୁଆଲି ନି ହେଇ ବଂଝା ଭଲ୍
ଇମାନେ ଗୁଟେ ଗୁଟେରେ ଦାଗ୍
ବଏଁସ୍ ଗଲା ବଫୁବି ଗଲା
କାଏଁ କାମ୍ ଆସ୍ବାହୋ ଇଏ
ମୁଇଁ ନାଇଁ ପାରେରେ ଭାଇ
ବୁଢ଼ାବୁଢିକେ ରଖ୍ବ କିଏ
ବୁଢ଼ାବୁଢ଼ୀ କେ ରଖ୍ବ କିଏ
