କୃଷ୍ଣ ଜନମ୍

କଂସର୍ ରାଜ୍ୟେ ପଡିଛେ ଡାକ୍‌ରା

ହେବେ ହୋ କୃଷ୍ଣ ଜନମ୍

ତାହାକୁ ମାର୍‌ଲେ ନିଜେ ଜିଇଁବା

କଂସ୍‌କେ ଧରେ ଭରମ୍

ବୁହେନ୍‌କେ ବି ଅତ୍ୟାଚାର୍ କଲା

ରଖିଦେଲା ବନ୍ଦୀଘରେ

ବାସୁଦେବ ସାଙ୍ଗେ ରହେଲେ ସହି

ସବୁ ଦୁଃଖର୍ ପ୍ରହାରେ

ଗୁଟେଗୁଟେ କରି ସାତ୍‌ଟା ପୁଓ

ଦେବକୀର୍ ଗଲେ ମରି

ମାଆ ହେଇ ସହିଛେ ସବୁ ଦୁଖ୍‌

ତଥାପି ଜୀବନ୍ ଧରି

ଅନିଏ ଦୁର୍ନୀତି କଂସର୍ ଲାଗି

ପାପ୍ ବଢ୍‌ଲା ହୋ ଯେଭେ,

ଭୁଦୋ ମାସର୍ ଅଷ୍ଟମୀ ତିଥିରେ

ଜନ୍ମିଲେ ଦେବକୀର୍ ଗର୍ଭେ

ଜୁଗାଲି ମାନେ ପଡ୍‌ଲେ ସୁଇ

କବାଟ୍ ଗଲା ଫିଟେଇ,

କୃଷ୍ଣର୍ ଆଦେଶେ ବାସୁଦେବ ରଜା

ନନ୍ଦ ଘର୍କେ ନେଲେ ବୁହି

ଚୋକିଦାର୍ ଉଗ୍ରସେନ ବୁଢାକେ

ଦେଲେ ପର୍‌ଭୁ ଦର୍ଶନ୍,

ଭାଗ୍ୟ କରିଥିଲା ଯମୁନା ନଦୀ

ଛିଇଲା କୃଷ୍ଣ ଚରନ୍

ନନ୍ଦ ରଜା ଘରେ ବଢ୍‌ଲେ କୃଷ୍ଣ

ସଁସେ ଆଦର୍ ଉଢାଲେ

ଦେବକୀର୍ ଜୀବନ୍ ସାର୍ଥକରେ

କାହ୍ନୁ ହାତେ ମୁକୁଲିଲେ

ଯୁଗେ ଯୁଗେ ପାପୀମାନେ କର୍‌ଲେ

ଘାଏରେ ପାପ୍ କରମ୍

ସାଧୁ ପାଲ୍‌ସନ୍ ପାପୀ ମେଟେଇ

ପର୍‌ଭୁ ହେଇ ଜନମ୍