ବରଷା ରାଣୀ ଟୁପୁରୁ ଟୁପୁରୁ ବରଷେ ପାଣି

ବରଷା ରାଣୀ ବରଷା ରାଣୀ l

     ଟୁପୁରୁ ଟୁପୁରୁ ବରଷେ ପାଣି ll

ବେଙ୍ଗରାଜା ବସି ସାରୁ ମୂଳରେ l

  ବେଙ୍ଗୁଲିକି ଧରି କହେ କୋଳରେ ll

ଆଷାଢ଼ ଶ୍ରାବଣ ବରଷା କାଳ l

    ଦୁମ ଦୁମ ଝଡ଼େ ପାଚିଲା ତାଳ ll

ମେଘ ଘଡ଼ ଘଡ଼ି ବାଜଇ ବାଜା l

     ଚାପ ଧରିଅଛି ବରଷା ରାଜା ll

ନୃତ୍ୟରତ ଦେଖ ମୟୂର ମାନେ l

    କଦମ୍ବ ଫୁଟିଲା ଗିରି କାନନେ ll

କୁଆ ମଣିତାରେ କୁଆ ମଣିତା l

   ପିଢାରେ ମାଡ଼ିଲା କଖାରୁ ଲଟା ll 

ଚଷା ଭାଇ ମୁଣ୍ଡେ ପଖିଆ ଭିଡ଼ି l

   ଥିରି ଥିରି ଚାଲେ ବିଲ ବେଉଡ଼ି ll

ବିଲୁଆ ନନାରେ ବିଲୁଆ ନନା l

    ଡାହାଣିଆ ଖରା ପଡ଼ିଛି ଅନା ll

ବରଷା କାଳରେ ପଲ୍ଲୀ ତରୁଣୀ l

    ପୂଜାକଲେ ମାଆ ଖୁଦୁରୁକୁଣୀ ll

ଶ୍ରାବଣ ଶେଷରେ ଭାଦ୍ର ପ୍ରବେଶ l

   ପୂଜାହେବେ ବିଦ୍ୟାପତି ଗଣେଶ ll

କୃଷ୍ଣାଷ୍ଟମୀ ଭାଦ୍ର ବରଷା ରାତି l

    ବ୍ରଜେ ଜନମିଲେ ପ୍ରଭୁ ଶ୍ରୀପତି ll

ଶରତ ମରତେ ଆସିଲା ଧାଇଁ l

    ବରଷା କାଳଟା ଗଲା ପଳାଇ ll