ବୃକ୍ଷର ଉପକାର

ଜିତେନ୍ଦ୍ର ନାଥ ପଟ୍ଟନାୟକ

ଜୀବଙ୍କର ଯିଏ ସଦା ଉପକାରୀ

ସିଏ ତ ଆମରି ବନ୍ଧୁ

ଜଗତର ହିତ ସାଧନା ପାଇଁ ସେ

ଅଟଇ ଦୟାର ସିନ୍ଧୁ l

ସଂସାରକୁ ଯିଏ ଦିଏ ଅମ୍ଳଜାନ

ଅଙ୍ଗାରକାମ୍ଳକୁ ନେଇ

ଜଳବାଯୁ ମଧ୍ୟୁ ଗରମକୁ ତଡ଼େ

ଶୀତଳ ପବନ ଦେଇ l

ଫୁଲ ଫଳ ଛାୟା ଦିଅଇ ସେ ସଦା

ଜୀବଜଗତଙ୍କ ପାଇଁ

ଖାଦ୍ୟ ବସ୍ତ୍ର ଆଦି ଯୋଗାଇ ଦିଏ ସେ

ମନରେ କୁଣ୍ଠା ନ ବହି l

ଯାହାଠାରୁ ଖାଦ୍ୟ ପାଇ ବନ୍ୟପ୍ରାଣୀ

ବନସ୍ତେ କରନ୍ତି ବାସ

ତାକୁ ଯଦି ଆମେ ଅବାଧେ କାଟିବା

ହୋଇବ ସୃଷ୍ଟି ବିନାଶ l

ଆମ ପରିବେଶ ସଦା ହେବ ସୁସ୍ଥ

ରହିବ ଯେବେଟି ବୃକ୍ଷ

ବିଶ୍ଵତାପ ନିଶ୍ଚେ ବଢିବ ଆଗକୁ

ହେଲେ ତାହା ପ୍ରତି ରୁକ୍ଷ l

ବୃକ୍ଷ ଲାଗି ମେଘ ଶୀତଳ ହୋଇଣ

ବରଷା କରଇ ଜଳ

ଜଳଠାରୁ ଆମେ ବିଜୁଳି ପାଇଣ

ଚଲାଉଛୁ ଆମ କଳ l

ରୋଗ ଠାରୁ ଆମେ ପାଇଥାଉ ରକ୍ଷା

ବୃକ୍ଷ ଔଷଧ ପାଇ

ପଶୁ, ପକ୍ଷୀ, କୀଟ ସଭିଏ ବଞ୍ଚନ୍ତି

ବୃକ୍ଷର ସେବାକୁ ନେଇ l

ବୃକ୍ଷ ଠାରୁ କେତେ ପାଉ ଉପକାର

ସମସ୍ତେ ବିଚାର କର

ବୃକ୍ଷ ଲଗାଇଣ ଜଙ୍ଗଲ ଗଢିଲେ

ସୁରକ୍ଷା ହେବ ସଂସାର l