ବନ୍ଧୁ

ସମସ୍ତଙ୍କ ସହ ସୁସମ୍ପର୍କ ରଖି

ବିଶ୍ବାସୀଙ୍କୁ ବନ୍ଧୁ ମଣ

ବେଳ ଅବେଳରେ ବନ୍ଧୁ ପାଇଁ ବନ୍ଧୁ,

ଭୁଲନାହିଁ ବନ୍ଧୁ ପଣ ।

ବନ୍ଧୁତା ନୁହଁଇ ଲାଭ ଆଉ କ୍ଷତି

ଜଟିଳ ଗଣିତ ଖାତା

ବିପଦେ ଆପଦେ ବନ୍ଧୁ ପାଇଁ ବନ୍ଧୁ

ଛିଡା ହୁଏ ଭିଡି ଅଣ୍ଟା ।

ଅସାଧୁଙ୍କ ସାଥେ ବନ୍ଧୁତା କରିବା

ବିପଦକୁ ନିମନ୍ତ୍ରଣ

ସାଧୁ ସଙ୍ଗତରେ ଭାବବନ୍ଧୁତାରେ

ଜୀବନ ହୁଅଇ ଧନ୍ୟ ।

ସେହି ବନ୍ଧୁପଣେ ପ୍ରଭୁ ଜଗବନ୍ଧୁ

ବନ୍ଧୁ ଦୁଃଖ କୁ ସେ ବୁଝି

ଭୋକେ ଶୋଇଥିଲେ ବନ୍ଧୁ ମହାନ୍ତି ଙ୍କୁ

ଖୁଆଇଲେ ଖୋଜିଖୋଜି ।

ବନ୍ଧୁ ପାଖେ ବନ୍ଧୁ କହିପାରେ ଖୋଲି

ତା ମନ ଗୋପନ କଥା

ବନ୍ଧୁ ମନ କୁ ତ ବୁଝିପାରେ ବନ୍ଧୁ

ବୁଝିପାରେ ମନ ବ୍ୟଥା ।

ବନ୍ଧୁ ସୁଦାମା ଙ୍କ ମନକଥା ବୁଝି

କଳାକାହ୍ନୁ କୃଷ୍ଣଚନ୍ଦ୍ର

କରିଲେ କରୁଣା ବିପ୍ର ସୁଦାମାଙ୍କ

ଦାରିଦ୍ର୍ୟ ହୋଇଲା ଦୂର ।

ବନ୍ଧୁ ହୋଇ ଯିଏ ବନ୍ଧୁକ ସାଜଇ

ନାହିଁ ତାର ଗତିମୁକ୍ତି

ଆଜି ନହେଲେବି କାଲି ନିଶ୍ଚେ ସିଏ

ଧର୍ମଦାଣ୍ଡେ ପାଏ ଶାସ୍ତି ।

ବନ୍ଧୁର ପଥରେ ବନ୍ଧୁ ର କାନ୍ଧରୁ

ଖସାଇ ଦେବନି ହାତ

ବନ୍ଧୁ ଦ୍ରୋହୀ ଜମା ହେବନାହିଁ ବନ୍ଧୁ,

ବନ୍ଧୁଦ୍ରୋହ ମହାପାପ ।