ବିଜୟା ଦଶମୀ

ଅସତ୍ୟ ଅନ୍ୟାୟ ଧ୍ବଂସି ବିଜୟାଦଶମୀ

ପ୍ରତି ଭାରତୀୟ ହିନ୍ଦୁ ହୃଦୟକୁ ଚୁମି

ସତ୍ୟ ନ୍ୟାୟ ସଂସ୍ଥାପନ

କରିବାକୁ ହୃଦେ ହୃଦେ ଦିଅଇ ଆହ୍ବାନ ।

ମହିଷା ନିଧନେ ଦେବୀ ଦୁର୍ଗା ଆବିର୍ଭୂତା 

ଦଶାୟୁଧ ଦଶହସ୍ତେ ଧରାଇ ଦେବତା

ଧରା କରାଇ ଉଶ୍ବାସ 

ଉଡ଼ାଇ ବିଜୟ ବାନା ଗର୍ବ ଦମ୍ଭ ନାଶ ।

ରଘୁକୁଳ ଶିରୀରାମ ପୂଜି ଦଶଭୂଜା

ରାବଣ ନିଧନେ ପ୍ରଭୁ ବିଜୟର ଧ୍ବଜା

ପତ୍ନୀ ସୀତା ଉଦ୍ଧାରିଣ

ସ୍ବର୍ଣ୍ଣିମ ସ୍ବାକ୍ଷରେ କୀର୍ତ୍ତି ଚିର ଅମଳିନ ।

ପ୍ରକୃତି କୋଳରେ ସ୍ବଚ୍ଛ ଶରତ ଋତୁରେ

ବିଜୟା ଦଶମୀ ପାଳି ମାତା ସ୍ବାଗତରେ

ତୋଳି ଭକ୍ତି, ସଦ୍ଭାବନା

ହରଷରେ ପୂରିଉଠେ ପ୍ରତିଟି ଅଗଣା ।

ନିଜ ନିଜ ଅନ୍ତରରୁ ଆସୁରିକ ଭାବ

ଯଦି ବିଲୋପନ କରି ପାରନ୍ତେ ମାନବ

ଏହି ଦିନର ମହତ୍ବ

ନିଶ୍ଚେ ବୁଝି ପାରୁଥାନ୍ତେ ସର୍ବେ ହୃଦଗତ ।

ନିରିମଳ ହୃଦୟର ଶାରଦୀୟ ଶୋଭା

ଆହା ! କି ଆନନ୍ଦମୟ ପ୍ରକାଶିତ ଆଭା 

ହରି ପ୍ରତି ଜନମନ

ଉଡ଼ାଇ ବି ପାରୁଥାନ୍ତା ବିଜୟ କେତନ ।