ବିଜୁଳି

ଇରମ ଗାଆଁର ମେଳଣ ପଡ଼ିଆ କିଟିକିଟି ଅନ୍ଧକାର,

ଶୁଭୁନାହିଁ ଆଉ ଗାନ୍ଧୀ ଜୟଧ୍ୱନି ଚାରିଆଡ଼େ ହାହାକାର |

ସହୀଦ ରକତେ ଭିଜିଥିଲା ମାଟି ଭୟଙ୍କର ଅନୁଭବ,

ଡିବିରି ଜଳାଇ ଚିହ୍ନୁଥିଲେ ଲୋକେ ନିଜ ପ୍ରିୟଜନ ଶବ |

ପାଦ ଅଟକିଲା ବିଜୁଳି ପାଖରେ ଛାତିରେ ବାଜିଛି ଗୁଳି,

ବାନର ସେନା ସେ କିଶୋର ବାଳକ କରିଥିଲା ଜନମେଳି |

ଫାଙ୍କାଗୁଳି ମାରି କହିଲା ପୁଲିସ ଚାଲିଯାଅ ଜାଗାଛାଡ଼ି,

ଗାନ୍ଧୀ ଜୟଧ୍ଵନି ଦେଇ କେତେଜଣ ଆଗକୁ ଆସିଲେ ମାଡ଼ି |

ବାସୁଦେବପୁର ଜମିଦାର ଘରୁ ପୁଲିସ ହେଲେ ବାହାର,

ମରଣ ସେନାଏ ମର ଅବା ମାର ଡାକରା କଲେ ପ୍ରଚାର |

ଗାନ୍ଧୀ ଗୋପବନ୍ଧୁ ବାଞ୍ଛାନିଧି ବାଣୀ ଶୁଣାଉଥିଲା ସେ ପିଲା,

ପୁଲିସ ବାରଣ ନମାନି ବିଜୁଳି ଗୁଳିରେ ଜୀବନ ଦେଲା |

ଇରମ ସଂଗ୍ରାମେ କେତେ ବୀରନେତା ଗୁଳିରେ ସହିଦ ହେଲେ,

ମେଳଣ ପଡ଼ିଆ ଆମ୍ବାତୋଟାଟିକୁ ରକ୍ତତୀର୍ଥ କରିଦେଲେ |

ଧନ୍ୟ ସେ ବିଜୁଳି ସାର୍ଥକ କରିଛି ନିଜର ନାମକୁ ଯିଏ,

ନିମିଷକ ପାଇଁ ଆଲୋକ ଦେଖାଇ ଅମର ହୋଇଛି ସିଏ |