ବିଦ୍ୟାର ମହତ୍ତ୍ୱ

ଗୁରୁ କହୁଛନ୍ତି ଶିଷ୍ୟ ଶୁଣ ମୋବଚନ

 ଆଳସ୍ୟ ପରିହରି ବିଦ୍ୟା କର ତୁ ଅର୍ଜନ l

ଜ୍ଞାନ ସିନା ଅଟେ ଅମୂଲ୍ୟ ସମ୍ପତ୍ତି

ହ୍ରାସ ହୁଏ ନାହିଁ ଦାନେ ବଢୁଥାଏ ନିତି l

ନୀଚକୂଳେ ଯଦି ଥାଏ ଜ୍ଞାନୀ ଜନ

କିଛି ନବିଚାରି ଜ୍ଞାନ କରିବୁ ଗ୍ରହଣ l

ଦୁର୍ଜନ ହୋଇଲେ ଯେତେ ପଣ୍ଡିତ ଵିଦ୍ଵାନ

ମଣିରେ ଭୂଷିତ ସେଯେ ସର୍ପର ସମାନ l

ତାସଙ୍ଗେ ତୁମେ ଯେବେ ବଢ଼ାଇବ ଭାବ

ତୁମର ବିନାଶ ନିଶ୍ଚେ ନୁହେଁ ଅସମ୍ଭବ l

ସର୍ପ ବଶ ହୁଏ ମନ୍ତ୍ର ଗଦ ବଳେ

ଦୁର୍ଜନ ସ୍ଵଭାଵ କେବେ ନବଦଳେ ହେଳେ l

ବିଦ୍ୟାବୁଦ୍ଧି ଜ୍ଞାନ ବଳେ ତ୍ରୈଲୋକ ଜିଣିବୁ

ବିଦ୍ୟାବୁଦ୍ଧି ବିହୀନେ ଅଜ୍ଞାନ ଅନ୍ଧାରେ ଭ୍ରମିବୁ l

ଧନର ମହତ୍ୱ ବଢ଼େ ଗରିବଙ୍କ ଠାରେ

ଜ୍ଞାନର ମହତ୍ୱ ଥାଏ ସମଗ୍ର ସଂସାରେ l

ଅନନ୍ତ ଅଗାଧ ସମୁଦ୍ର ଅଟଇଯେ ଜ୍ଞାନ

ସେସିନ୍ଧୁ ଜଳେ ନିତ୍ୟେ କର ତୁ ସ୍ନାନ l

ସୁକୋମଳ ଶଯ୍ୟା ନୁହେଁ ତୁମର ଜୀବନ

ସଂଘର୍ଷେ ବିତିଲେ ଦିନ ଅନ୍ତେ ଲଭିବୁ ସମ୍ମାନ l