ବିଚିତ୍ର କର୍ମା

ପ୍ରହ୍ଲାଦ ଚିନ୍ତିଲା ପ୍ରଭୁ ଦୟାମୟ ହରି l

ହିରଣ୍ୟ ବୁକୁ ଚିରିଲ ସ୍ତମ୍ଭରୁ ବାହାରି ll

ଧ୍ରୁବ ଚିନ୍ତି ନମଃ ଭଗବତେ ବାସୁଦେବ l

ମହାପ୍ରଭୁ ଧ୍ରୁବପୁରେ ଦେଲ ତାକୁ ଠାବ ll 

ଅଦ୍ଭୁତ ବାମନ ରୂପେ ବଳି ଦ୍ୱାରେ ଗଲ l

ତିନିପାଦ ଭୂମି ମାଗି ପାତାଳେ ଚାପିଲ ll

ତ୍ରେତୟା ଯୁଗରେ ରାମରୂପେ ଅବତରି l

ଚରଣସ୍ପର୍ଶେ ତାରିଲ ଗୋଉତମ ନାରୀ ll

ସେତୁବନ୍ଧେ ରାମନାମେ ପଥର ଭାସିଲା l

ରାମନାମେ ହନୁମାନ ଲଙ୍କା ଜଳାଇଲା ll

ଦଣ୍ଡକ ବନରେ ତପୀ ବରଜରେ ଗୋପୀ l

ମୋହି ଥିଲ ଜଗନ୍ନାଥ ପ୍ରଭୁ ବିଶ୍ଵବ୍ୟାପୀ ll

ଅନ୍ଧ ବ୍ରାହ୍ମଣଙ୍କୁ ଚକ୍ଷୁ ଅବହେଳେ ଦେଲ l

ଚଉଦବ୍ରହ୍ମାଣ୍ଡ ମୁଖେ ମାତେ ଦେଖାଇଲ ll

ଯତନେ ସଳଖି ଦେଲ କୁବୁଜାର ଖଞ୍ଜା l

ଯାମଳାର୍ଜୁନ ତାରିଲେ ଶକଟାର ଭଞ୍ଜା ll

ଦ୍ରୌପଦୀ ବିକଳ ଦେଖି କୁରୁସଭା ତଳେ l

କୋଟିବସ୍ତ୍ର ବର୍ଷାକଲ ଅନ୍ତରୀକ୍ଷୁ ହେଳେ ll

ଚକ୍ରରେ ବୁଲାଅ ନାଥ ଏ ସାରା ଜଗତ l

ସୃଷ୍ଟି ସ୍ଥିତି ଲୟ ପାର୍ଶ୍ୱେ ଘୁରେ ଚକ୍ରବତ ll

ବିଚିତ୍ର ତୁମ୍ଭ ଲୀଳା କେ ବର୍ଣ୍ଣନେ ସମର୍ଥ l

ବିଚିତ୍ରକର୍ମାଙ୍କୁ ମୋର କୋଟି ଦଣ୍ଡବତ ll