ଭୂତାଣୁ ମର୍ଦ୍ଦିନୀ

    

     ବରଷା ମୁହଁ ମୋଡି ପଥହୁଡା 

      ସୁଲୁ ସୁଲୁ ଶୀତେଇ ବାଆ ମୃଦୁ ସଞ୍ଚରିତ

  କୁଞ୍ଚୁକୁଞ୍ଚୁ ଧଳା ମେଘମାଳା ଆକାଶଛାତିରେ ସୁଚିତ୍ରିତ 

   କେଣ୍ଡା କେଣ୍ଡା କାଶତଣ୍ଡି ଧରଣୀ ବକ୍ଷେ ବିଭାମଣ୍ଡିତ  

          ଶରତରାଣୀ ଆଗତପ୍ରାୟ 

  ମନ୍ଦାର ମଣ୍ଡେଇ ଦେହକୁ ସଜାଇ ଅପେକ୍ଷାରତା ପ୍ରକୃତି

        ମାଆର ସ୍ବାଗତ ସୂଚନା ପାଇ

 ଛତ୍ରଭଗ୍ନ ଦେଇ ଇତଃସ୍ତତଃ ଧାବମାନ ଅଦୃଶ୍ଯ ଦାନବ -

    -ଏ କାଳର ଦୁଷ୍ଟ ଭୂତାଣୁ ଭିନ୍ନ ଏକ ମହିଷା

       ତ୍ରସ୍ତ ମାନବର ତନୁମନ ପୁଲକିତ 

       ଜିଇଁ ଉଠିବ ପୁଣିଥରେ ସଭ୍ଯତା 

       ପୁଣି ଜଳିବ ଧୂଆଁ, ଜଳିବ ଚୁଲୀ 

            ଶୁଭିବ ଘୁଁ ଘୁଁ ଶବ୍ଦ 

      କୋଳାକୋଳି ହେବେ ସବୁ ଜନପଦ 

     ସୁପ୍ତ ପୃଥିବୀ ଚେଇଁ ଉଠିବ ସ୍ବପ୍ନକୁ ସାଉଁଟି 

         ଅପସରି ଯିବ ଦାନବ ପ୍ରକୋପ 

     ପୂର୍ବ ପରି ହୋଇଯିବ ସବୁ ମାନବୀୟ ଲୀଳା  

       ନିଶ୍ଚେ ଅଦୃଶ୍ଯ ଦାନବ ସଂହାର ହୋଇବ 

   ଦଶଭୂଜା ମଙ୍ଗଳମୟୀ ମାଆ ହେଲେଣି ଧରାବିଷ୍ଟ 

          ବୋଲାଇବାକୁ ଭୂତାଣୁମର୍ଦ୍ଦିନୀ ।