ଭାଗ୍ୟରୁ ହଜିଲା ଖୁସି
ଭାଗ୍ୟରୁ ହଜିଲା ଖୁସି
ଲାଉ ମୋ ପିଠିରେ ଘରଣୀ ସବାର୍
ଚାହିଁବା କରିଛି ଆଡ଼
ବୟସ ହେଲାଣି ମତେ ତ ବୋଲୁଚି,
'ଟୋକିକି ଉଣ୍ଡିବା ଛାଡ଼ !'
ଦିଅଁକୁ ଡାକିକି କାନକୁ ଧରିକି
ପକାଏ ସାକୁଲା ରାଣ
ତଥାପି ବାୟାଣୀ ନିଆଁକି ପାଉଁଶ
ଗଳାକୁ ଘାଗଡ଼ା ବାଣ !
ଯାତରା ପଦାରେ ଭଲକି ବୁଲିବା
ମଉଜ ଜମୁନି ଆଉ
ଭିଡ଼ରେ କାହାଠି ଦିହଟା ବାଜିବ
ଆକଟ ତାହାରି ଭାଉ !
ଖାଇବା ପିଇବା ଚୁଲିକି ଗଲାଣି
ବସୁନି ହୋଟେଲ ଛକ
କହିଲା, ନିଲଠା ପଣକୁ ଆଦର
ହସିବେ ଦେଖିଲା ଲୋକ !
ହାତକୁ ହଲେଇ ସ୍ବାଗତ କରିଲେ
ଛୁଞ୍ଚିଟା ଯାଉଚି ଗଳି
କୋଉ ମାଇପର ଭଉଣୀ ସିଏକି
ଜବର ଦେଉଚି ଗାଳି !
ଫୋନକୁ ଘାଣ୍ଟିଲେ ଓହଟି ଚାହୁଁଛି
ଦେଖୁଛି କାହାର ଛବି
ଭିଡ଼ିଓ ଚାଲିଲେ ଝପଟି ଆସୁଛି
ଯେମିତି ଦବଟି ଖୋବି !
ଅଡୁଆ ଭିତରେ ମୁସ୍କିଲ୍ ପଶିଛି
ହାତକୁ ଦି'ହାତ ଆସି
ଆପଣା ଭଲକୁ ସଳଖି ହେଉନି
ଭାଗ୍ୟରୁ ହଜିଲା ଖୁସି !