ବାପାଙ୍କ ହାତ ଘଣ୍ଟା

ବାପାଙ୍କ ବାମ ହାତରେ 

ପରସ୍ତେ ମଇଳା ଜମା, ଖୁବ ପୁରୁଣା

ଚାବି ଦିଆ ହାତ ଘଣ୍ଟା । 

ଯାହାକୁ ବାପା ସବୁ ଦିନ ଠିକ୍ ବାରଟାରେ 

ଚାବି ଦେଇ ଦେଲା ପରେ 

ସେ ଚାଲିବା ଆରମ୍ଭ କରେ 

ଆଉ ବାପା ତା’ ସାଙ୍ଗରେ 

ତାଳ ଦେଇ ଦଉଡିବା ଆରମ୍ଭ କରନ୍ତି 

ଜୀବନ ସଂଘର୍ଷର ମୈଦାନରେ ।

ଯେଉଁଠି ବାପା ଖଞ୍ଜି ଦେଇଛନ୍ତି ନିଜକୁ 

ଉଠିବାଠୁ ଶୋଇବା ଯାଏଁ 

ଆଉ ଶୋଇବା ଠୁ ଉଠିବା ଯାଏଁ 

ଆଉ ସେଇଥି ପାଇଁ ତ

ପ୍ରତିଟି ସମୟରେ ତାଙ୍କ ତୀକ୍ଷ୍ଣ ନଜର

ହାତ ଘଣ୍ଟାର କଣ୍ଟା ମାନଙ୍କ ଉପରେ । 

ତା’ର ପ୍ରତିଟି ଟିକ୍ ଟିକ୍ ଶବ୍ଦ 

ବାପଙ୍କୁ ବୋଧେ ଭାରି ଜୋର୍ ରେ ଶୁଭେ 

ତାଙ୍କ ଦାୟିତ୍ଵ ସବୁକୁ ଚେତେଇ ଦିଏ 

ବାପଙ୍କୁ ସତେଜ କରିଦିଏ ସବୁବେଳେ ।

ଆଉ ବାପ ବି ତା’ର ପ୍ରତିଟି ନିର୍ଦ୍ଦେଶକୁ 

ବୁଝି ନିଅନ୍ତି ଖୁବ ସହଜରେ ।