ବାହୁଡ଼ି ଆସ ହେ ମୋ ଜଗାକାଳିଆ

ବାହୁଡ଼ି ଆସ ହେ ମୋ ଜଗାକାଳିଆ 

ଭକତରସିଆ ତୁଳସୀମାଳିଆ,

ଭାବରେ ବାନ୍ଧିଛ ଭାବ ବିନୋଦିଆ 

ତୁମ ବିନା କିଏ ଭବେ ହେବ ସାହା,

ବାହୁଡ଼ି ଆସ ହେ ।

ଛାଡ଼ି ଗଲ ତୁମେ ରତ୍ନ ସିଂହାସନ

ଶ୍ରୀକ୍ଷେତ୍ର ଦିଶେ ତ ଶ୍ରୀହୀନ ମଳିନ,

ମାତା ମହାଲକ୍ଷ୍ମୀ କରିଛନ୍ତି ମାନ

ମିଳେନା ଆଉ ତୁମ ଅବଡ଼ା ଅନ୍ନ

ବାହୁଡ଼ି ଆସ ହେ ।

ଖାଇଲ ବାଣ୍ଟିଲ ବାବନ ପଉଟି

ଅଭାବ ପଡୁଛି ଏତେ ଯେ ସାଉଁଟି,

ତୁମ ବିନା କିଏ ବୁଝାଇ ଦେବଟି

ମଣିଷ ମନର ସେ ମୋହ ମାୟାଟି,

ବାହୁଡ଼ି ଆସ ହେ ।

ବଡ଼ଦାଣ୍ଡ ତୁମ ହୋଇ ବି ପ୍ରଶସ୍ତ

ବାଟବଣାରେ ମଣିଷ ଅସ୍ତବ୍ୟସ୍ତ,

ବାଟ ସରୁ ନାହିଁ କଲେ ଯେତେ ଗସ୍ତ

ଫେରି ଆସି ତୁମେ କରାଅ ଆଶ୍ବସ୍ତ,

ବାହୁଡ଼ି ଆସ ହେ ।

ସକଳ ତୀର୍ଥ ତ ତୁମ ଚରଣରେ 

ଛାଡ଼ି ତୁମକୁ ମୁଁ ଯିବି କିଆଁ ଦୂରେ,

ଆଶ୍ରୟ ଦିଅ ହେ ତୁମ ଚରଣରେ

ଜପୁଥିବି ତୁମ ନାମ ଆନନ୍ଦରେ,

ବାହୁଡ଼ି ଆସ ହେ ।