ଅଲାରନାଥେ

ଅଲାରନାଥେ ହେ ଅଲାରନାଥେ

କୁହ ପ୍ରଭୁ ତୁମ୍ଭେ ଅଛ କେମନ୍ତେ l

କାଳିଆ ଶୋଇଲା କୀଳିଣୀ କିଳି

ଭକତେ ଲଗାନ୍ତି ପୀଠେ ଗହଳି l

ବ୍ରହ୍ମ ବନେ ପ୍ରଭୋ ବାସ ତୁମ୍ଭରି

ବ୍ରହ୍ମା ଥାପି ଥିଲେ ଯତନ କରି l

କ୍ଷେତ୍ରବରେ ତୁମ୍ଭେ ଆଦି ଦେବତା

ପୂରାଣ ବଖାଣେ ତୁମ୍ଭରି କଥା l

ଜଗା କାଳିଆଙ୍କ ଦେଖା ନପାଇ

ଆସି ଥିଲେ ଦିନେ ଭକ୍ତ ନିମାଇଁ l

ପଥରେ ଶୋଇଲେ ତୁମରି ଆଗ

ରହି ଗଲା ଶିଳା ଖଣ୍ଡରେ ଦାଗ l

ବ୍ରାହ୍ମଣ ବାଳକେ ସଙ୍ଗାତ କରି

ଯତନେ ଖାଇଲ ଚାଉଳ ଖିରୀ l

ଦେଖାଇଲ ଶିରି ଅଙ୍ଗ ଫୋଟକା

ବ୍ରାହ୍ମଣ ହୋଇଲେ ଅତି ତାଟକା l

ଆଲବନ୍ଦାଚାର୍ଯ୍ୟ ଆସିଲେ ପୁଣି

ଦର୍ଶନ ନ ପାଇ ଶ୍ରୀକ୍ଷେତ୍ର ମଣି l

ଚାରି ଭୁଜ ବିଷ୍ଣୁ ରୂପ ଦେଖାଇ

ତୋଷିଲ ସାଇଁ ସେ ଭକତସାଇଁ l

ଅଣସର କାଳେ ତୁମ୍ଭ ଦର୍ଶନେ

ଭକ୍ତ ମନ କଥା ଶୁଣୁ ତୁ କାନେ l

କେଉଁକାଳୁ ବିଜେ ବ୍ରହ୍ମ ଗିରିରେ

ଭକତ ସନ୍ତୋଷ ଖଣ୍ଡ ଖିରୀରେ l

ମହାବିଷ୍ଣୁ ମୋର ପ୍ରଣାମ ଘେନ

ଶରଣ ପଶିଲା ଦୃଢ଼େ ଅଜ୍ଞାନ ।