ଅଭିମାନୀ ଭକ୍ତ
ଅଭିମାନୀ ଭକ୍ତ
*॥୧॥*
ଆହେ ଜଗତ ଈଶ୍ୱର
ପ୍ରଭୁପରାତ୍ପର
ଜାଣି ହୁଏ ନାହିଁ ପ୍ରଭୁ
ଅନ୍ତର ତୁମର
ତୁମ ନାମଟି ଅନନ୍ତ
ଏ ବିଶ୍ଵବ୍ରହ୍ମାଣ୍ଡେ ଏକା
ତୁମେ ବଳବନ୍ତ ॥
*॥୨॥*
ତୁମେ ହେ ଜଗାକାଳିଆ
ବଡ କପଟିଆ
ନଟବର ନାମ ତୁମ
ହେ ନଟ କୁଟିଆ
ଯେ ଭକତି କରେ ତାକୁ
ଦାଣ୍ଡେ କର ଠିଆ ॥
*॥ ୩॥*
ତୁମେ ବଡ ଦଗାଦିଆ
ନାଶି ନିଜ ବଂଶ
ନ ରଖି ଉପ୍ରୋଧ
ବଧ କଲ ମାମୁଁ କଂସ
ତୁମକୁ ଯେ ଆଶା କରେ
ନାନା କଦର୍ଥନା ଦାନ
କର ବିଶେଷରେ ॥
*॥ ୪॥*
ଶଙ୍ଖ ଚ଼କ୍ର ଗଦା ପଦ୍ମ
ଧରିଛ ହସ୍ତରେ
ଖଣ୍ଡିଆ ହାତେ ବସିଛ
ଦେଉଳ ଭିତରେ
ପଦ୍ମ ଠାରେ କିଆଁ ମନ ?
ସୂର୍ଯ୍ୟଙ୍କୁ ଛାଡି ଭ୍ରମରେ
କରେ ପ୍ରୀତି ଦାନ ॥
*॥୫॥*
ଶଙ୍ଖକୁ ଧରିଛ କରେ
ଧ୍ଵନୀ ପାଇଁ ଖାଲି
ବୃଥାରେ ଗରଜିମରେ
ଶୁଭ ଶଙ୍ଖ ବୋଲି
ବୃଦ୍ଧି କରଇ ଯାତନା
ସ୍ଵାର୍ଥପର ଶଙ୍ଖଧାରୀ
ତୁମ ନାମ ସିନା ॥
*॥୬॥*
ଚକ୍ରଧାରଣ କରିଛ
ନାମ ଚ଼କ୍ରଧାରୀ
ଭୟ ଲାଗେ ଦରଶନେ
ତା ରୂପ ଶ୍ରୀହରି
ଗ୍ରହ ଶିର ଛେଦ ପରେ
କଳଙ୍କି ଲାଗି ଯାଇଛି
ତାହାର ଧାରରେ ॥
*॥୭॥*
ମୋ କଷଣ ନାଶିବାକୁ
ନାହିଁ ତାର ବଳ
ମନରେ ବିଚାର କର
ପ୍ରଭୁ ଆଦିମୂଳ
ଆଙ୍ଗୁଠିର ଶୋଭା ପାଇଁ
କଷ୍ଟକୁ ନ ନାଶି ଦୁଷ୍ଟ
ନାଶକର ସାଇଁ ॥
*॥୮॥*
ଗଦାଧର ତୁମ ନାମ
କିଏ ଦେଲା କାହିଁ ?
ତୁମ ଗଦା ଦୁଃଖ ପଦା
କରି ନ ପାରଇ
ତୁମ ଗଦାକୁ ପ୍ରଣାମ
ଦାନବ ଦଳନେ କେଉଁ
ଯୁଗେ ଥିଲା କାମ ? ॥
*॥୯॥*
ଦୁଃଖି ଦୁଃଖ ସହି ମରୁ
ତୁମେ ଯାତ୍ରା କର
ତୁମର କି ଯାଏ ଆସେ
ରସିକ ନାଗର
ରାଧା ବିରହିଣୀ ହେଉ
କୁବୁଜା ପ୍ରେମରେ ବୁଡି
ତୁମ ଦିନ ଯାଉ ॥
*॥୧୦॥*
ମୀରା ବିଷପାନ କରୁ
ଗିରିଧର ଡାକି
ଯଶୋମତୀ ଝୁରି ମରୁ
ଗୋପରେ ଏକାକୀ
ତୁମେ କରୁଥାଅ ଲୀଳା
ଅଭିମାନୀ ଭକ୍ତ ପ୍ରାଣ
କଣ୍ଠାଗ୍ରତ ହେଲା ॥