ଆସିଛି ରଜ

ଏ ବେଳା କାଳେ ବରଷାର ମେଳେ 

ଆସିଛି ରେ ଏବେ ଦେଖ ରଜ

କେତେ କେତେ ଦିନ ଅପେକ୍ଷା ପରେ 

ହୁଅ ସବୁ ଏବେ ସଜବାଜ ।

ବାନ୍ଧ ଏବେ ଦୋଳି ନ କର ଡେରି 

ହେଇଛି କାଳ ତ ମହାମାରୀ

ମେଳି ହେବ ନାହିଁ, ସେ ଦିନ ନାହିଁ 

ଏବେ ମନକୁ ଦେଇଛି ମାରି ।

ଯେଝା ଘରେ ସବୁ ପାଳିବେ ଏବେ 

ଏକା ଏକା ରହି ସୁରକ୍ଷିତ

ଯେତେ ଯାହା ହେଲେ ପର୍ବ ଆମରି 

ରୀତି କୁ ପାଳିବାକୁ ହେବ ତ ।

ପିଠା ପଣା କରି ଦିଅଁଙ୍କୁ ଦିଅ 

ଜାଣିଛନ୍ତି ସେ ଆସିଛି ରଜ

ମନ କଥା ଏବେ ତାଙ୍କୁ କହିବ 

କରି ତାଙ୍କୁ ବି ତ ସଜବାଜ ।

ସାଙ୍ଗ ସାଥି ମେଳ ହୋଇଛି ମନା 

ଦାଉ ସାଧିଛି ଏବେ ତ କରୋନା

କେତେ ଯେ ଜୀବନ ନେଲଣି ଦୁଷ୍ଟ 

ଯିବାର ତ ନାଁ ଏବେ ଧରେନା ।

ଝିଅ ଝିଆଣି ମନ ଏବେ ନିରାଶ 

ମୁହଁରୁ ଲିଭିଛି ତାଙ୍କ ହସ

ପୁଅ ପୁତୁରା ବସି ଭାବୁଛନ୍ତି 

ବାଗୁଡ଼ି ଖେଳ ହେବ ଅଦୃଶ୍ଯ ।

ମା ମାଉସୀ ବି ମନ ମାରିଛନ୍ତି 

ଗାଁ ବୁଲିବା ତ ହୋଇଛି ମନା, 

ବାପା ଦାଦା ସବୁ ଅଶାନ୍ତ ହୁଅନ୍ତି 

ପଶା ପାଲି କହେ, ମତେ ଅନା । 

ଚାଷୀ ଭାଇ ତ ଚାହିଁ ରହିଥାଏ 

ଏ ଦିନେ ହେବ ମାଟିର ପାଗ

ଏବେ ସେ ଭାବୁଛି ନିରାଶ ହୋଇ 

ତା ଉପଜ କାହାକୁ ବିକିବ ।

ମୌସୁମୀ ଆସିଛି, ମାଟି ଭିଜିଛି 

କିନ୍ତୁ ନାହିଁ ତାର ସ୍ୱାଗତ ମଜା

ଏବେ ସଭିଏଁ କାତରେ ରହନ୍ତି 

ଆସିଛି ରଜ, ବାଜୁନି ବାଜା ।

ଶୁନ୍ ଶାନ୍ ସବୁ ରାସ୍ତା ବଜାର 

ସଭିଙ୍କୁ ଲାଗେ ଭୀଷଣ ଡର

ତଥାପି ପ୍ରଭୁଙ୍କର ଇଚ୍ଛା ମାନି 

ଆସିଛି ରଜ, ପାଳନ କର ।