ଆରେ ମୋର କହ୍ନେଇ

    

ତା ଥେତ ତାଥେଇ ତାଥେଇ

ମନ ମୋର ଆଜି ନାଚଇ

ଆରେ ମୋର କହ୍ନେଇ 

ସର ଲହୁଣୀ ଦେବି ମୁଁ ଖୁଆଇ

ପୀତ ବସନ ଦେବି ମୁଁ ପିନ୍ଧାଇ

ଚନ୍ଦନ ଟିପାରେ ଦେବି ମୁଁ ସଜାଇ

ଅଣ୍ଟାରେ ତୋହର ଘୁଙ୍ଗୁର ବାନ୍ଧିବି

ଚାଲିବୁ ତୁ ଝୁମ୍ ଝୁମ୍ ହୋଇ

ବଂଶୀ ଟିଏ ତୋ କଟିରେ ଖୋସିବି

ମୟୂର ଚନ୍ଦ୍ରିକା ଚୂଳରେ ବାନ୍ଧିବି

ଦେଖିବି ମୁଁ ଆଖି ପୂରାଇ

ଯାମଳା ଗଛରେ ବାନ୍ଧିବି ନାହିଁ ରେ

ଝୁଲାଇ ରଖିବି ବାହୁ ବନ୍ଧନରେ 

ହୃଦ ସିଂହାସନେ ମନ ବୃନ୍ଦାବନେ

ରଖିବି ତୋତେ ମୁଁ ବସାଇ

ଶୟନରେ ଅବା ସପନରେ ହେଉ

ମନ ଅଗଣାରେ ନାଚିଯା ରେ ତୁହି

ଆଣ୍ଠୁଆ ଗୋପାଳ ହୋଇ

ଜନମ ଜନମ ଆଶା ପୂରି ଯିବ

କୋଳେ ତୋତେ ଧରି ଦେଇ

ଆରେ ମୋର କହ୍ନେଇ 

ତୋ ବାଟ ରହିଛି ମୁଁ ଚାହିଁ ।