ଆମେ ସ୍ବାଧୀନ

ସ୍ବାଧୀନ ଆମେ ସ୍ବାଧୀନ

ଆମେ କିନ୍ତୁ ସବୁ ପର ଅଧୀନ ।

ପ୍ରକୃତି ପାଖରେ ବନ୍ଧା ପଡିଅଛି

ଆମରି ଜୀବନ ସୁଖ ସପନ ।

ଜ୍ୟେଷ୍ଠ ରେ ହୋଇଲା ପ୍ରବଳ ବର୍ଷା

ଶ୍ରାବଣରେ ଏଣେ ବଢୁଛି ତୃଷା ।

 ମେଘ ବୁଝୁନାହିଁ ବରଷା ଭାଷା

 ମଉଳି ଯାଉଛି ଚାଷୀ ର ଆଶା ।

କହିବ କାହାକୁ ଶୁଣିବ କିଏ

କଲା କରମରୁ ଖାଉଛୁ ଢିଏ ।

ସ୍ବାଧୀନ ବୋଲିତ ଶୃଙ୍ଖଳା ନାହିଁ

ପରିବେଶ କଥା ଭାବୁନୁ କେହି ।

ବଣ ଜଙ୍ଗଲକୁ ଉଜାଡୁ ନିତି

ପ୍ରଦୁଷଣ ପ୍ରତି ନାହିଁ କା ଭିତି ।

ଗାଡି ମଟରର ବଢୁଛି ଭିଡ

ବିଷ ପବନର ଉଠୁଛି ଝଡ ।

ବିକାଶ ନାଁ ରେ କରୁ ବିନାଶ

ଜାଣିଜାଣି ଆମେ ହେଉ ହତାସ ।

ଶ୍ରାବଣରେ ତେଣୁ ବରଷା ନାହିଁ

ଝାଞ୍ଜି ପବନକୁ ହେଉନି ସହି ।

ସ୍ବାଧୀନ ବୋଲିତ ଗରବ ଆମ

ପ୍ରକୃତି ହେଉଛି ଆମକୁ ବାମ ।