ଆକାଶ କଇଁଆଁ ଚିଲିକା ମାଛ

ମେଘା ବର୍ଷା ଖେଳୁଥିଲେ, ଦାଣ୍ଡ ପିଣ୍ଡାରେ,

ମଜ୍ଜି ଯାଇଥିଲେ ଦୁହେଁ, ଖେଳ ଭିତରେ l 

ମା ବାପାଙ୍କର ଶୁଭିଲା ପାଟି,ଘର ଭିତରେ,

କିସ ତରକାରୀ ହେବ, ଆଜି ଦିନରେ l

ମେଘା ବର୍ଷା ଧୀରକିନା ଶୁଣିଲେ,କାନ ଡେରି ,

ମାଆ କହୁଥିଲେ ଆଜି ହେବ, ମାଛ ତରକାରୀ l

କଥା ନ ସରୁଣୁ ଶ୍ରୀମତୀ, ଦେଉଛ କହି,

ପକେଟରେ ବା ମୋର, ପଇସା ନାହିଁ l

ଶୁଣିବି ନାହିଁ ମୁଁ କିଛି କଥା,ଆଜି ତୁମର,

ଝୁଲା ମୁଣା ଧରି ଆଗ, ଯାଅ ବଜାର l

ବାବୁଙ୍କ ପକେଟ, ଥିଲାତ ଖାଲି ,

ପଇସା ମୁଣିକୁ ଦେଲେ ଅଣ୍ଡାଳି l

ପାଇଲେ ମୁଣିରୁ, ଟଙ୍କା ଶହେଟି,

ଶହେ ଟଙ୍କା ଅଛି ଦେଖ ଶ୍ରୀମତୀ l

କିସ ଆଣିବି ଏବେ, କହ ତୁରିତ,

ଘଡିଏ ଭିତରେ ବଜାର ହେବଟି ଶେଷ l

ଟଙ୍କାକ ଲେଖାଏଁ ଆଣିବ ଶହେ ଜିନିଷ,

ସଉଦା ଭିତରେ ନିହାତି, ଥିବଯେ ମାଛ l

ମାଛ କଥା ଶୁଣି ପାଟିରୁ ବହିଲା ଲାଲ,

ଖାଇବେ ଦୁହେଁ ତାଙ୍କ ପ୍ରିୟ, ମାଛର ଝୋଳ l

ପାଖରେ ଥିଲାଯେ ମେଘାର, ଗେଲ୍ଳେହି ପୁଷି,

ମାଛ କଥା ଶୁଣି ସେ ଦେଲା,ମୁରୁକି ହସି l

ସଉଦା ପାଇଁକି ବାପା, ଗଲେ ବଜାର,

ଏଠି, ସେଠି ଗପି ଡେରି,ହେଲା ତାଙ୍କର l

ଯାଇକି ଦେଖିଲେ ବାବୁ, ବଜାର ଶେଷ,

ଗଛ ମୂଳେ ବସି ମାରିଲେ, ଦୀର୍ଘ ନିଶ୍ୱାସ l

ଦେଖା ହେଲା ତାର ଭାଇ,ଦନେଇ ସାଥେ,

କିବା ଚିନ୍ତାରେ ପଡିଛ କହ,ଓହୋ ସାଆନ୍ତେ l

କିବା କହିବିରେ ମୋର, ଭାଇ ଦନେଇ,

ଆସିଥିଲି ମୁହିଁ ବଜାର, କରିବା ପାଇଁ l

ଶହେ ଟଙ୍କାର ନେବି, ଶହେ ଜିନିଷ,

ସଉଦା ଭିତରେ ନିହାତି, ଥିବଯେ ମାଛ l

ବେସର ବାଟି ପ୍ରସ୍ତୁତ, ଥିବେ ଶ୍ରୀମତୀ,

କିବା ଉତ୍ତର ଦେବି ତାଙ୍କୁ, ଜାଣି ପାରୁନାହିଁଟି l

ଭାଉଜ ପାଖକୁ ତୁମେ, କହିବ ଯାଇ,

ବଜାରେ ଭେଟିଲି ମୁଁ, ଭାଇ ଦନେଇ l

ବଜାରରେ ମାଛ, ନଥିଲା ଭଲ,

ଚିଲିକାରୁ ମାଛ ଆଣିଦେବ ସଅଳ l

ଆକାଶରୁ ଆଣି, ଦେବ କଇଁଆଁ,

ସେ କଇଁଆଁ ଖାଇଲେ ତୁମେ ହେବ ବାଇଆ l

ମେଘା ବର୍ଷା ବସିଛନ୍ତି,ମାଆ ପାଖରେ,

ପୁଷି ବସି ଅଛି,ଦ୍ୱାର ମୁହଁରେ l

ଘଡିଏ ପହରେ ଦୁହେଁ ବାଟକୁ,ଦିଅନ୍ତି ଚାହିଁ,

ଏତେବେଳ ହେଲାଣି ବାପାଙ୍କ ଦେଖାତ ନାହିଁ l

ଚାହୁଁ ଚାହୁଁ ଗଡି,ଗଲାଣି ବେଳ,

ଖଟା ହୋଇଲାଣି ଦେଖ, ବେସର ଝୋଳ l

ମ୍ୟାଉଁ ମ୍ୟାଉଁ ହୋଇ, ପୁଷି କହଇ,

ମାଛ କଣ୍ଟା ଆଜି, ଭାଗ୍ୟରେ ନାହିଁ l

ବାପା ଆସିଗଲେ, ସାଇକେଲ ଚଢି,

ଛୁଆ ଦୁହେଁ ତାଙ୍କ ପାଖେ, ଗଲେ ଦଉଡି l

ନସର ପସର ହୋଇ, ଶଂଖୀ ବିଲେଇ,

ଶୁଂଘିଲା ସେ, ମାଛର ଗନ୍ଧ, କାହିଁରେ ନାହିଁ l

ଯାହା କହିଥିଲା ଦନେଇ ଭାଇ,

ଗୋଟି ଗୋଟି କଥା ଦେଲା ଫିଟାଇ l

ଦେଖୁ ଦେଖୁ ବିତିଗଲା ବରଷ,

ଦେଖାନାହିଁ ଦନେଇ ର ଚିଲିକା ମାଛ l

କାନ ମୋଡି ହେଲା ଶଂଖୀ ବିଲେଇ,

ଆଜିଠୁ ମାଛକୁ କେବେ ଛୁଇଁବି ନାହିଁ l

ଛୁଆଙ୍କ ସାଥେ ଶପଥ, କଲେ ଶ୍ରୀମତୀ,

ଭୁଲ ସୁଧାରିବାକୁ, ଅଛି ତୁମ ଶକତି l

ଆକାଶରୁ କଇଁଆଁ ଯେବେ ତୁମେ ଆଣିବ,

ସେଦିନ ଚିଲିକା ମାଛ ରୋଷେଇ ହେବ l