वांज
वांज
मोठ्या थाटात गेले
नऊ दिवस नव्याचे
नवसाच्या देवीगत
चोचले पुरवले माझे
मग काही दिवसातच
वंश वाढीची मांग झाली
सासू सासरे आईबाबा झाले
मी त्यांची मुलगी झाली
प्रेम असं ऊतू जात होतं
लाडाने माझं मन न्हात होत
अशी कशी नजर लागली
जेव्हा ती बातमी सर्वांना कळाली
रिपोर्ट माझे वाचण्यात आले
परत परत तपासण्यात आले
आईबाबा बदलून मग
परत सासू सासरे झाले
पदोपदी आठवण देत सारे
सार्यांची दोषी मीच आहे
आई बनू शकत नाही
असं डिफेक्टीव पीस आहे
स्विकार नाही माझा आता
हि काळ्या दगडाची रेघ आहे
माझ्या पापण्यांवरती आता
दाटलेले काळे मेघ आहे
काळ्या मनागत ही
काळी सांज आहे
लेकरं नव्हते मला अन
पण त्यांच मनच वांझ आहे