तुझी याद आली
तुझी याद आली
अशी अचानक आज प्रिये का तुझी याद आली
गंधित वेडा अनिल सारा असा कुठे हरवला
पारिजात तो तुझ्या वनीचा कधीच रे मावळला
तरी कसे घन बरसले मनातल्या आभाळी
अशी अचानक आज प्रिये का तुझी याद आली
तुला उमगली परी न कळली, अबोल माझी प्रीती
मज हून तुजला दूर खेचते, सुप्त कोणती भीती
वेळ लोटला सांजेस किती, रात्र अजून ना झाली
अशी अचानक आज प्रिये का तुझी याद आली
रोज निशेला स्वप्न भेटते नव्या जीवनाचे
आज मजला वेध लागती पुन्हा मीलनाचे
प्रीतगंध सांडले सुखांनी सुरेल संध्याकाळी
अशी अचानक आज प्रिये का तुझी याद आली