लाइब्रेरी
प्रोफाइल
संवेदना
संवेदना
1 min
257
पाण्याच्या थेंबाला काय माहीत
तहानेतील व्याकुळता
त्यासाठी चातकाचा जन्म हवा
बर्फाच्या कणाला काय माहीत
रखरखीत वाळवंटातील दाहकता
त्यासाठी निवडुंगाचा सदरा हवा
गोऱ्या कांतीला काय माहीत
सावळ्या रंगातील सुंदरता
त्यासाठी गालावर तीळ हवा
उघड्या डोळ्यांना काय माहीत
मिटलेल्या डोळ्यांमागची भयाणता
त्यासाठी गांधारीचा पण हवा
चकचकीत बुटांना काय माहीत
अनवाणी पायातील अगतिकता
त्यासाठी वारकऱ्याचा भाव हवा
परतीच्या जीवाला काय माहीत
जन्मलेल्या जीवाची आतुरता
त्यासाठी ममतेचा स्पर्श हवा
मोकळ्या हातांना काय माहीत
जोडलेल्या हातातील आस्तिकता
त्यासाठी दगडाला शेंदूर हवा
