रक्षण वसूंधरेचे....
रक्षण वसूंधरेचे....
जाणुनी मोल जीवनाचे
थांबवूया विद्रुपीकरण निसर्गाचे...
सोडूनी हाव स्वार्थीपणाची
रक्षण करूया वसुंधरेचे...||धृ||
निळ्या निळ्या आकाशात
स्वच्छंदी भिरभिरती पक्षी
हिरव्यागार पानाफुलांची
उमटते धरणीवर नक्षी
मंजुळ गाणे ऐकत राहावे
डोंगर कुशीतून वाहणाऱ्या नदीचे...
सोडूनी हाव स्वार्थीपणाची
रक्षण करूया वसुंधरेचे...||१||
वृक्षसंपदा देणगी अमूल्य
पाण्यावाचून भकास जीवन
नाते जपावे प्राणिमात्रांशी
निसर्ग राहिल पवित्र पावन
टिपून घ्यावा सुगंध मातीचा
अगणित उपकार धरणी मायेचे...
सोडूनी हाव स्वार्थीपणाची
रक्षण करूया वसुंधरेचे...||२||
आभाळाचा रंग पिऊनी
सागरास ही कवेत घेऊया
ठेवू वागणे शहाण्यासम इथे
संपत्तीस या प्राणपणे जपूया
थांबेल विनाश पृथ्वीमातेचा
कुंपण घालू आता मर्यादांचे...
सोडूनी हाव स्वार्थीपणाची
रक्षण करूया वसुंधरेचे...||३||
टाळूया प्रदूषण, लावूया झाडे
थांबवूया नाश पर्यावरणाचा
जोडुया निसर्गाशी विशुद्ध नाते
विचार ठेवूया भविष्यकाळाचा
हातामध्ये हात गुंफुनी सारे
वैभव खुलवूया या सृष्टीचे...
सोडूनी हाव स्वार्थीपणाची
रक्षण करूया वसुंधरेचे...||४||