पाऊस आला

आला पाऊस आला आला

हिरव्या मातीत मोर वनी नाचला.....

रिमझिम-रिमझिम आला खाली

धरतीमाता झाली ओली

अंतरातून आला उमाळा........

झिरमिर-झिरमिर पागोळ्यांची

संथ लयीतील ऐका गाणी

सूरतालाचा खेळ कसा रंगला........

चमचम-चमचम चमके बिजली

धडाडढुमढुम ढोल वाजवी

थेंबाथेंबाने बरसत आला..........

गरगर वायू गिरक्या घेई

पाचोळ्याला घुमवित राही

पानाफुलांना हसवित आला........

पदन्यास ते सुरेख टाकीत

वर्षाराणी आली ठुमकत

जीवसृष्टीला आनंद झाला.........