लावणी

नटून थटून मी तयार होता,

कशाला तुम्ही एकटक बघता

पाटील खिडकीत बसून,गालात हसून नुसतंच खुणवता llधृll

वय नुकतच सरल सोळा

करुनी तुम्ही तिरका डोळा

बाहुंचा हार घालते मी गळा

जीव झुरं हा तोळा..तोळा

नका करु खोडी दुरून, याव जवळच तुम्ही हो आता

पाटील खिडकीत बसून,गालात हसून नुसतंच खुणावता ll१ll

थरथरं हे ओठ,अंग माझं शहारी

चोळी होई तंग जीव हा घाबरी

रंगुन जाऊ या पीरतीच्या खेळांत

मला जागा द्याहो तुमच्या हृदयात

माझ्या जीवाची करुन उलघाल,काहोअसं तुम्ही छळता

पाटील खिडकीत बसून,गालात हसून नुसतंच खुणवता ll२ll

मज रुप मनामध्ये अस भरा

मजला राणी तुमची हो करां

देते तुम्हां या दिलात मी थारा

अंगी भरलाय हो ईष्काचा वारा

नयनांची भाषा बोलून ,का हो तुम्ही दुरुनच असं डुलता

पाटिल खिडकीत बसून,गालात हसून नुसतंच खुणवता ll३ll