जुने दिवस
जुने दिवस
जुने दिवस एक छानसे घर असावे गावाकडच्या भागाकडे,
सायंकाळी ओसरीत बसून मी पण पाहावे माडाकडे I
एक असावी छोटी बाग, घराच्या पुढल्या अंगणामध्ये,
जाई-जुई, शेवंतीचा गंध दरवळावा मनामधे II १ II
पुढल्या अंगणात तुळशीचे वृंदावन, शोभा वाढावे घराची,
मागच्या अंगणात विहिरीने, तहान पोसावी सर्वांची I
माडीवरून करकरत हलवा, हिंडोळा तो सागाचा,
नभी निशेला लुकलुकणारा प्रकाश असावा चंद्राचा II २ II
त्या घराच्या स्वयंपाकघरातून सुवास यावा सुग्रासतेचा,
घरच्या सर्वांनी गोल बसून फडशा पाडावा त्या सगळ्याचा I
दिवाणखान्यात मोठ्यांचा फड सजवा गप्पांचा,
अंगणामधल्या बागेमध्ये दरबार भरावा छोट्यांचा II ३ II
बाया बायकांची लगबग असावी जणू दिवस सणाचा,
आल्या-गेल्या सर्वांनाच आग्रह असावा जेवणाचा I
सख्खे, चुलत, आत्ते, मावस, भेदभाव नसावा नात्यांचा,
एकजीव होऊन एकत्र रहावे जसा काला कृष्णाचा II ४ II
रात्री झोपण्याआधी, पुन्हा वाटे गोष्ट आजीने सांगावी,
पुन्हा एकदा लहान होऊन आजोबांच्या कडेवर स्वारी निघावी I
मस्ती करून, भीतीने बाबांच्या घरात लपून बसावे
बाबांनी हात उगारताच मात्र आईने मधे पडावे II ५ II
आता मात्र घरामध्ये पाहुणे तसे कमीच येतात,
वेळच नसतो असे सांगून सगळेच येणे टाळतात I
जग बदलले असे म्हणून माणूसच खरा बदलला,
कारण सूर्य तरी अजून पूर्वेऐवजी पश्चिमेला नाही उगवला II ६ II
आपल्याघरी नाही आले जरी कुणी, आपण तरी कुठे जातो?
सगळ्यांनाच आसक्ती स्वतःची , कोण कुणास विचारतो?
सगळ्यांनाच जमेल असा मग बेत एकदा आखावा
एकत्रपणे सर्वानी मिळून आनंद एकदा लुटावा II ७ II
तंत्रज्ञानाने जवळ आणलं म्हणून लोक हल्ली तिथेच बोलतात
एखाद्याचे लिहिणे खटकले तर सरळ भांडत सुटतात l
तंत्रज्ञानाने खरं सांगा तुम्हाला आणलाय का हो जवळ?
लांब असून जवळ आहात हे भासवण्याचं ते मृगजळ ll ८ ll
सोडा रे सगळे व्याप ते, भेटू पुन्हा एकदा कडकडून
लहानपणीच्या आठवणीत सगळे पुन्हा एकदा रमून l
उरलेच आहोत कितीसे आपण, वडीलधारे ते निघून गेले,
आपलीच तर आहे जबाबदारी नाते टिकवण्याची ती भले ll ९ ll
पुन्हा एकदा सर्वांनी, त्या घरात एकदा जमायचे,
आपण जपले ते आता पुढच्या पिढीला दाखवायचे l
होतील ते पण खूप खुष, वाटेल त्यांना हा खजिना,
नाती जपण्यातच आनंद खरा हे पटेल पुन्हा सर्वांना ll १० ll