अभिशाप

शुभेच्छांच्या भाऊगर्दीत 

आज श्वास घुसमटला आहे 

काही उदास चेहरे 

जणू जाब विचारत आहेत 

चेहरा त्या कळ्यांचा

फुलण्याआधीच खुडल्या गेल्या 

चेहरा त्या निर्भयांचा 

तेवण्याआधीच विझवल्या गेल्या 

चेहरा तो विद्रूपलेला 

तेजाबापेक्षा विखारी 

नजरांनीं दाहलेला

सवाल यांचा एकच आहे 

आमच्यातही लक्ष्मी,सरस्वती 

नी दुर्गेचा वास आहे

आज करताय ज्यांचे सोहळे

त्यांना आमचेच का होते वावडे

आमच्यातही होतीच की 

झाशीवाली नी माता जिजाबाई

मग विटंबना का झाली 

आमच्याच भावनांची

आमच्याही कर्तृत्वाला 

फुलायचे होते

नितळ पाण्यासारखे 

जगायचे होते

लाभले ना भाग्य आम्हा ते

अभिशाप बनला स्त्रीत्व आमचे

मागणे आहे एकच आमचे

नको कौतुक नको सोहळे

वरदान ठरू द्या स्त्रीत्व आमचे