आई तुझी आठवण

येता तुझी आठवण व्याकुळ मी होइ आई ।

रोज देवा बोले भेटव रे माझी आई ।।

दाटे मग पापणीतुनी हलकेच पाणी ।

पुसावयास आई तुजवीण येई न कोणी ।।

होता काक आर्जव पोटामध्ये भुकेचा ।

दुधभात कोण भरवी तुजवीन मायेचा ।।

भुक न शमे कधी ममता मज न मिळे ।

तुजवीन अश्रुंचे मी घोट रोजच गिळे ।।

नयनातुनी झोपेचे येती ढग दाटूनी गडे ।

कुशीवीन तुझ्या पापण्यांचे मिलन न घडे ।।

बाळ मी तान्हुलाच उचलुनी मज घे ।

अंगाई गीत गाण्या जरा येई तु वेगे ।।

नको मज खेळणी हट्ट न करणार कधी ।

रुसणार मी न पुन्हा तुजवरी आई कधी ।।

मी तुझी वाट इथे रोजच पाही ।

एकदाच ये ना तू परतूनी आई ।।

चोरटा तो देव चोरली माझी आई ।

गेली आहे का रुसुनी त्याचीही आई ?

चोरट्या त्या देवापरी मज नको दुसरी आई

परत जन्म घेउनी तुच हो माझी आई ।

परत जन्म घेउनी तुच हो माझी आई ।।