ജീവന്റെ പാതി

മിഴികൾ തുറന്നിരുന്നത് നിന്നെ കാണുവാനായി,

എന്റെ വിരൽത്തുമ്പ് ചലിച്ചിരുന്നതും നിന്നെ നിറങ്ങളിൽ ചാലിക്കുവാൻ,

എന്റെ ശ്രവണേന്ദ്രിയങ്ങളെ ത്രസിപ്പിച്ചിരുന്നത്

നിൻ സ്വരമാധുര്യം.

നിൻ കാൽച്ചിലമ്പിൻ കിലുക്കം ഇന്നുമെൻ 

കാതിൽ അലയടിച്ചിടുന്നു; നിന്റെ കുപ്പിവള 

കൈകൾ ഓടിവന്നു കണ്ണുപൊത്തിയതും 

ഞാൻ മറന്നില്ല , നിന്റെ മൂടിയിഴ തൻ ഗന്ധവും 

പുഞ്ചിരി നിറഞ്ഞ നിൻ അധരങ്ങളും 

മറക്കുവാൻ എനിക്കാവില്ല, നിന്റെ നിഴലാവാൻ കൊതിച്ചു ഞാൻ , നീ എന്റെ പ്രാണൻ .

എന്തിനായി നീ ദൂരേക്ക് മാഞ്ഞുപോയി?

നീ എന്നെ അറിഞ്ഞിരുന്നില്ലേ, എന്റെ 

ഹൃദയം തുടിച്ചതും എന്റെ കണ്ണുകൾ 

വിടർന്നതും, അധരങ്ങൾ തൻ ആഗ്രഹങ്ങളും 

നീ അറിഞ്ഞില്ലേ, നിനക്കായി കരുതിയൊരായിരം ഉപഹാരങ്ങൾ എന്നെ ദുഃഖത്തിലാഴ്ത്തി, 

തിരികെ നീ വരില്ലെന്നിരുന്നാലും , 

എന്റെ പടിപ്പുര വാതിൽ നിനക്കായി ഞാൻ തുറന്നിടും,

എന്റെ ജീവന്റെ പാതിയാവാൻ ക്ഷണിക്കപ്പെട്ടവൾ നീ മാത്രം ...