എയ്ഡ്‌സ്

ഏഴുവലം വച്ചു കൈകോർത്തു പിടിച്ചു

മനസ്സിൽ ഉരുവിട്ട വാക്കുകൾ

പാഴ്‌വാക്കുകളായി

ഹൃദയങ്ങൾ തമ്മിൽ അടർന്നു മാറി

ബന്ധങ്ങൾ ബന്ധനങ്ങളാക്കി

പരസ്പരം വാക്കുകൾകൊണ്ട് മുറിവേല്പിച്ചു

വെറുപ്പിൻ പടച്ചട്ട അവർക്കുള്ളിലായി തീർത്തു

കൊട്ടിയടക്കപ്പെട്ട കോട്ടമതിൽ കെട്ടി ഇരുവരും 

അറ്റക്കണ്ണികൾ വിളക്കാനാശയില്ലിനി

പുതുവേരുകൾ തേടാനായി തുടിക്കുമൊരു ഹൃദയം

കൂടുവിട്ടു കൂടണയണം ഹൃദയ ബന്ധനമില്ലാതെ 

പല പുതുക്കണ്ണികളിൽ ചേക്കേറി

പൂവുകൾ തോറും പാറി നടന്നൊരു വണ്ടായ്മാറി

തേൻ നുകർന്ന ചുണ്ടുകളിൽ ആനന്ദനടനമാടി

ഒന്നിൽ നിന്നും ഒന്നിലേക്കു മാത്രം നൽകേണ്ടത്

പകുത്തു നൽകി

ഒന്നല്ല രണ്ടല്ല... പല പല കണ്ണികളിലേക്കുമായ്

പലനാൾ തുടരെ...ആടിയൊരു ആട്ടകഥ

ആലസ്യം വിട്ടൊരുനാൾ ഞെട്ടിയുണർന്നു 

ആരുമില്ലെന്നറിഞ്ഞു...ആരുമില്ലാതെയലഞ്ഞു

പുതുബന്ധങ്ങളിൽ മതിമറന്നാടിയതിനു

വിധി നൽകിയൊരു നാമം...എയ്ഡ്‌സ്