ಜೀವಪ್ರಪಂಚ

ಮೂಡಣದರಮನೆ ಬೆಳಗಲು

ಕಣ್ತೆರೆಯಿತು ಜೀವ ಪ್ರಪಂಚ ll

ಹೊಸಹೊಸತನಗಳ ಪುನರಾರಂಭ

ಸೃಷ್ಟಿ ಸಮೂಹದ ಜೀವತರಂಗ l

ಹಕ್ಕಿಯ ಗಾನದಿ ಜೀವದ ನಲಿವು

ತಣ್ಣಗೆ ಬೀಸುವ ಗಾಳಿಯ ಹರವು ll

ಕಣ್ತೆರೆಯಲು ಮೈ ಕೊಡಹಲು

ಗರಿಬಿಚ್ಚಲು ಪುಟಿದೇಳಲು..l

ನವನವ ದಾರಿಗಳನೇಕವು

ಸೃಷ್ಟಿಯ ಬೇರಿನ ಹರವು ll

ಎಲೆಗಳ ಮೇಲಿನ ಹನಿಯು

ಸೂರ್ಯಕಿರಣದ ಪ್ರಕಾಶದಿ l

ಮಂಜಿನೊಳಗೆ ಮಿನುಗಲು

ಪ್ರತೀ ಹನಿಯೂ ಮುತ್ತುಗಳು ll

ಮರದ ಬೇರು ಹೂವ ಪರಿಮಳ

ಮಣ್ಣಿನ ಸಾರ ಬದುಕ ಜೀವಾಳ l

ಉಸಿರಿನ ಹಸಿರು ಬತ್ತದ ಜಲ

ಪಂಚಭೂತಗಳ ಸಾನ್ನಿಧ್ಯ ತೇರು ll

ಹಸಿರಿನೊಳಗೆ ಉಸಿರಿನೊಡಲು

ಕಾರ್ಯಕಾರಣದಾ ಹೊನಲು l

ನೀರ ಮೇಲಿನಾ ಮಂಜಿನಪ್ಪುಗೆ

ಜೀವಹನಿಗಳಿಗೆ ಮರುಘಳಿಗೆ ll

ಮೂಡಣದರಮನೆ ಬೆಳಗಲು

ಕಣ್ತೆರೆಯಿತು ಜೀವ ಪ್ರಪಂಚ ll