खेल भांडा
खेल भांडा
जमावू मोरो बहिन संग
नहानपनं आपलो मेल |
एक कोनटोमा सुरू होय
मंग ढकना पारोको खेल ||१||
नहान नहान खेल भांडा
कुंभार घरलं आनं माय |
उनकोमा बनावत होता
गंमतको सयपाक चाय ||२||
गंमतको सयपाक लाई
मुरमुरा चिवड़ाको भात |
टुरुपोटू सपाई खाजन
आमला रव्ह गर्वकी बात ||३||
बाहुला बाहुलीको बियामा
कागजकी डफरीको बाजा |
नवरी सजं श्रृंगारलका
बसं घोड़ा पर दुल्हा राजा ||४||
नवरदेव नवरी कभी
बनत नहान टुरा टुरी |
खेल गंमतको बरातमा
मीच खासरको धुरकुरी ||५||
खेलभांडा भय गया जुना
रव्हसेती आता शो केसमा |
आबको टुरुपोटूइनला
पायजे मोबाईल हातमा ||६||