રાધુજીનો પત્ર

રાધાશ્યામ

અ-૩૬ વિશ્વાસ નગરી,  

પ્રેમનગર પાસે, 

પત્ર માર્ગ , હ્રદય નગર.

તા: ૨૨ ફેબ્રુઆરી ૨૦૨૨

કૃષ્ણદેવ 

લાગણી નગર,

યાદ માર્ગ,

કલ્પના લોક.

પ્રિય,

પ્રથમ વખત એવું બનશે કે, તારા જન્મદિવસે આપણે સાથે નહિ હોઈએ. રાત્રે ૧૨નાં ટકોરે જ હું તને શુભેચ્છા પાઠવી દેતી. મારી લાગણીઓનો વરસાદ એવો તો વરસતો કે તું પૂરેપુરો ભીંજાય જતો. એ લાગણીઓની ભીનાશ હજુ પણ મારી આંખોમાંથી વહે છે. આજે તને શુભેચ્છા પાઠવવા જ પત્ર લખી રહી છું. ખબર છે આ પત્રનો કોઈ વળતો પ્રત્યુત્તર નથી મળવાનો તો પણ લખી રહી છું. તારાં દરેક જન્મદિવસે આપણે સાથે જ રહ્યાં છીએ અને અનેક યાદગાર ક્ષણો સમેટી છે, એવી યાદો જે ક્યારેય પણ આપણાં બંન્નેનાં હૃદયમાંથી નહિ વિસરાય.

 ચાલ છોડ આ બધી વાતો, સૌ પ્રથમ તો તને જન્મદિવસની અઢળક શુભેચ્છાઓ, ઈશ્વર તારી બધી જ મનોકામના પૂર્ણ કરે. દીર્ઘ આયુષ્ય અર્પે મારી ઉંમર પણ તને લાગી જાય. તને જીવનની દરેક ખુશીઓ મળે અને તને લેશમાત્ર પણ દુઃખ ન આવે, મારી ખુશીઓ પણ તને મળે. તને ખૂબ સફળતાં મળે અને તું જીવનમાં ખૂબ સિદ્ધિ સાધે. તારું જીવન પુષ્પોની જેમ ખીલી અને મહેકી ઊઠે.

 કેટલાં મજાનાં હતાં એ આપણાં પ્રેમનાં પાંચ વર્ષ અનેક સ્વપ્નો આપણે નયનોમાં જીવંત કર્યાં હતાં.

 આજે પણ હું તને એટલો જ પ્રેમ કરું છું, જ્યારે પણ પ્રેમનું નામ આવે ત્યારે મારાં નયન સમક્ષ તારો જ ચહેરો અંકિત થઈ જાય છે. આજે પણ બસમાં જતી હોવ છું ત્યારે બાજુની સીટ ખાલી જોઈને મને તારી યાદ આવી જાય છે. આ રીતે આપણે પણ જતાં, તું મારો હાથ પકડી રાખતો અને કહેતો ક્યારેય પણ આ હાથ અને સાથ નહીં છોડું. પરંતુ આજે આ બધું સ્વપ્ન જ છે, તું માત્ર ને માત્ર મારી કલ્પનામાં જ છે. 

તને પણ એ પળો યાદ આવી ગઈ હશે અને તું પણ રડતો હશે. 

 કદાચ તું પણ મને નહીં જ ભૂલી શક્યો હોય કેમ કે તું હંમેશાં મને કહેતો 

"ભૂલી તો વસ્તુને જવાય તું તો મારો જીવ છે, તને તો કઈ રીતે ભૂલી શકાય !"

આ તારા શબ્દો મારા હૃદયને હંમેશાં સ્પર્શી જતાં આજે પણ આ વાક્ય મને યાદ આવે છે ત્યારે મારાં આંસુઓ રોકાતાં નથી. આ વાક્ય વાંચીને તારી આંખમાં પણ એક પળ માટે તો આંસુ આવી જ ગયાં હશે. અલગ તો તું પણ થવા ન માંગતો હતો અને હું પણ પરંતુ દિવસે ને દિવસે આપણાં વચ્ચે અંતર આવતું ગયું અને અંતે સંબંધ પણ ટૂટી ગયો. કારણ કે હવે મને મારાં પ્રેમનાં પૂરાવા આપવાની હિંમત મારામાં ન રહી હતી, પ્રેમ હોઈ ત્યાં પૂરાવા તો ન જ આવવાં જોઈએ. આ તો મારું માનવું છે. ખુશ તો હું પણ ન હતી તારાથી અલગ થઈને અને તું પણ ખુશ તો નહિ જ હોય. કારણ કે સમય સાથે બધું જ બદલાઈ જાય છે, માત્ર નથી બદલાતી તો લાગણીઓ. તારી યાદોનો વાયરો એવો ચાલે છે કે લાખોની ભીડ વચ્ચે પણ હું પોતાને એકલી મહેસૂસ કરું છું.

 હું ભૂલે-ચૂકે મસ્તીમાં પણ સંબંધ તોડવાની વાત કરતી તો, ત્યારે તું એમ કહેતો તું સંબંધને તોડવાની અને ભૂલવાની વાત ન કર. જ્યાં સુધી છીએ ત્યાં સુધી સંબંધ રહેવા દે.

  મને તારાં આ શબ્દ ખૂબ જ રડાવે છે,

જ્યારથી તને જોઈ ત્યારથી તને મેં મારી દુનિયા માની લીધી હતી. ત્યારથી જ તારાં સાથે સાત જન્મ તો નહીં પણ આ એક જન્મ તારા સાથે જીવનભર સાથે રહીશ તેવી પ્રાર્થનાઓ કરી લીધી છે. આજે બધુ સાવ બદલાઈ ગયું છે જેની તે અને મેં ક્યારેય પણ કલ્પના પણ નહોતી કરી. 

  લિ.

પ્રેમ માર્ગે ચાલતી રાધા.