પ્રેમ ની સાચી મહેક

અઢી અક્ષરનો પ્રેમ એ કોઈ એક દિવસ,એક ‌ઋતુ, અમુક ઉંમર કે અમુક સમયગાળાનો મહોતાજ નથી, એતો બારેમાસ ચાલતા વાસંતી વાયરાનો મધમીઠો અહેસાસ છે. ઉંમરનો તડકો તેને સુકવી ન શકે કે ન મુસીબતોનો વંટોળ તેને ઉડાવી શકે. દિલથી જોડાયેલી લાગણીસભર સંબંધ સદાબહાર ખીલતો અને મહેકતો રહે છે.

તો ચાલો આપણે પણ માણી આવા જ એક પ્રેમની મિશાલને પ્રેરણારૂપ એવા આ પ્રેમ- સંબંધની મહેક ને..

સદાય મહેકતો રહેતો ચહેરો માપસરની ઊંચાઈ, મધ્યમ બાંધો, ઘંઉવણૉ વાન, ગાલ પરનું ખંજન ને હોંઠો પર સદાય વહેતું સ્મિત જેની સુંદરતામાં ઉમેરો કરતુ એવી નવયૌવના ધરા. અને વાચાળ, ચંચળ સ્હેજ ભીનો પણ નમણાશમાં ઘોળાય જતો વણૅ, એકદમ ઘાટીલો બાંધો, ને સુંદર સ્વભાવ તેની સુંદરતામાં વધારો કરી દેતા આવો નવયુવાન આકાશ.

આકાશ અને ધરા બંને એક ઇવેન્ટ કંપનીમાં સાથે જોબ કરતા હતા. મધ્યમવગૅમાંથી આવતા બંને ઘરની જવાબદારીના ભારને ઓછો કરવા મથી રહ્યા હતા. એક જ ઓફિસમાં સાથે નોકરી હોવાથી ધીમે ધીમે તેમની વચ્ચે મિત્રતા બંધાઈ ગઈ. આકાશ ને ખબર પડી કે ધરાને સાંજે ઘરે જવામાં અગવડ પડતી, રીક્ષા કે સીટી બસનો સહારો લેવો પડતો. એટલે આકાશે ધરાને રોજ ઘર સુધી મૂકવા જવાનું નક્કી કર્યું. ધરા એ ઘણી આનાકાની કરી પરંતુ આકાશ સામે તેમનુ ચાલ્યું નહીં. પછી તો દરરોજ આકાશ તેને ઘરે મુકવા આવવા લાગ્યો. બન્ને નું ઘર એક જ રસ્તે પડતું એટલે રસ્તામાં બંને અનેક પ્રકારની અલક મલકની વાતો ચર્ચાઓ અને ક્યારેક દલીલો કરતા. ધીમે ધીમે મિત્રતા ગાઢ થતી ગઈ. ક્યારેક ચા-કોફી કે પાણીપુરી પણ બંને એકબીજાને કંપની આપતા થઈ ગયા. બંનેની આ ગાઢ મિત્રતા ક્યારે પ્રેમમાં પલટાઈ ગઈ એ બંનેમાંથી કોઇને ખબર ન પડી.     

વસંતપંચમીનો દિવસ હતો. આકાશ ધરીને મુકવા જતી વેળાએ અચાનક વાહન રોકીને તેને પ્રપોઝ કર્યું. ધરાને ઘણા સમયથી લાગતુ તો હતુ કે આકાશ તેને પ્રેમ કરે છે. આકાશના પ્રપોઝથી તેની આશંકા સત્યમાં પરિવર્તિત થઈ. ધરા એ આકાશ પાસે સમય માગ્યો કે મને વિચારવા માટે એક મહિનાનો સમય આપ. પચીસ દિવસ એમ જ સાથે પસાર થયા.પરંતુ એકદિવસ કોઇ કારણસર આકાશ ઓફિસ ના આવ્યો ત્યારે ધરાને આકાશની ખોટ વર્તાય. તેમને આકાશની કમી મહેસુસ થઇ અને તેના પ્રેમનો અહેસાસ થયો. બીજે દિવસે જ્યારે આકાશ ઓફિસે આવ્યો કે તરત જ ધરા એ તેના પ્રેમ પ્રસ્તાવનો સ્વીકાર કરી અને હા પાડી દીધી. ધરા અને આકાશનો પ્રેમ શરૂ થયો. હરવું-ફરવું સાથે બેસી વાતો કરવી. અમને એમ દિવસો વિતતા ગયા. બંનેનો પ્રેમ ગાઢ બનતો રહ્યો.

એક દિવસની વાત છે જ્યારે આકાશ ધરાને મળવા જઈ રહ્યો હતો. ધરા તેની રાહ જોઈ રહી હતી. અડધી કલાક રાહ જોયા પછી તેણે આકાશને ફોન લગાવ્યો. બે-ત્રણ વાર ફોનની રીંગ પૂરી થઈ છતાં આકાશનો ફોન ઉપાડ્યો નહી એટલે ચિંતાતુર થઈ તે આકાશ ના ઘરે દોડી આવી. ઘરમાં પગ મૂકતાં જ તેમને જોયું કે આકાશના મમ્મી રડી રહ્યા હતા. ઘરના સર્વ ચિંતાતુર હતા. આકાશના રૂમનો દરવાજો ખૂલી રહ્યો ન હતો ને અંદરથી કોઈ જવાબ ન મળી રહ્યો હતો. અંતે દરવાજો તોડીને સહુ અંદર ગયા ત્યાંનું દ્શ્ય જોઇ બધા અવાક રહી ગયા. આકાશ બેભાન અવસ્થામાં પડ્યો હતો. તેના મુખમાંથી ઘણું લોહી વહી ગયું હતું. કોઈને કંઈ સમજાયું નહોતું રહ્યું કે અચાનક શું થઇ ગયું તરત જ તેમને હોસ્પિટલ ખસેડવામાં આવ્યો.

ધરા તો આ બધું જોઈ એકદમ સ્તબ્ધ થઈ ગઈ હતી. તે કંઈ સમજી શકતી ન હતી કે આ અચાનક શું થયું ? આકાશના મમ્મી પપ્પા સાથે તે પણ હોસ્પિટલે ગઈ.

હોસ્પિટલમાં કલાકોના નિદાન સીટી સ્કેન અને રિપોર્ટ પરથી ખબર પડી કે આકાશને લીવર બ્લોકેજ (ORTAL CAVERNOMA) નામની બીમારી છે. ડોક્ટરના કહેવા મુજબ તે ખૂબ જ ગંભીર બીમારી છે . અને જે  આકાશને વારસામાં મળી હતી અને આજે પચીસ વર્ષે ડિટેકટ થઇ હતી. અઠવાડિયા સુધી હોસ્પિટલમાં તેમની સારવાર ચાલી ધરા પણ આ સાત દિવસ સુધી આકાશના પરિવાર સાથે જ હોસ્પિટલમાં રહી .આ રોગની ગંભીરતા અને જણાવતા ડોક્ટરે કહ્યું કે "અન્નનળીમાં કાણા પડી ગયા છે ઓપરેશન કરવું પડશે ઓપરેશન પછી પણ દર વર્ષે એન્ડોસ્કોપી કરાવી પડશે."

હિમોગ્લોબીન વધવુ ન જોઈએ, વજન વધવું કે ઘટવું ન જોઈએ. ભોજનમાં મીઠું કે તીખાશ વધી ન જાય નહિતર એ એમના માટે જીવલેણ બની શકે છે. આ બધું સાંભળીને તો આકાશના પરિવાર પર આફતનું આભ તૂટી પડ્યું. એકદમ ભારે હૃદયે ધરા પણ ઘરે ગઈ. ડોક્ટરની વાતથી તેમની ચિંતા ઘણી વધી ગઈ તેને આખી રાત ઉંઘ ન આવી.

ઓફિસ માં બધા ને એવું લાગતું હતું કે હવે ધરા બ્રેકઅપ કરી લેશે. પરંતુ બ્રેકઅપ ન તો તેમને સપને પણ વિચાર ન આવ્યો. અને તેમણે આકાશનો જીવનભર સાથ આપવા માટે પોતાને વધુ ને વધુ મક્કમ બનાવી તેમનો પ્રેમ બીજાથી કંઈક અલગ જ હતો .

ધરાના મતે પ્રેમની વ્યાખ્યા કંઈક અલગ જ હતી પ્રેમ એ માત્ર હરવા, ફરવા કે મોજ મસ્તી માટે જ નથી હોતો. પરંતુ દિલ અને લાગણીઓથી જોડાયેલો આ સંબંધ કપરા સમયમાં અને સંજોગના તાપમાં વ્યકિતની પડખે અડીખમ ઉભા રહી પ્રેમ હુંફથી મુશ્કેલીઓનો સામનો કરવા મકકમ હતો.

દસેક દિવસની રિકવરી બાદ આકાશ ઘરે આવતા જ ધરા એ તેમની આગળ લગ્નનો પ્રસ્તાવ મુક્યો અને તેમના મમ્મી પપ્પાને ઘરે વાત કરવા મોકલવાનું કહ્યું. આકાશ સમજી શકતો ન હતો કે આવા સમયે પોતે શું નિર્ણય લેવો. તેમણે ધરાને સમજાવવાની ઘણી કોશિશ કરી કે પોતે આ બીમારીની ગંભીરતાને સમજે અને આકાશને ભૂલી કોઈ સારો છોકરો શોધી તેમની સાથે લગ્ન કરી લે. પરંતુ ધરા એમ કંઈ પીગળે તેમ ન હતી તે તેમના નિર્ણય ઉપર અડીખમ હતી. તેમણે તરત જ આકાશ ને કહ્યું કે "જો કદાચ મારી સાથે આવું થયું હોત તો તું શું મને છોડીને ચાલી જાત ?" આકાશ પાસે કંઈક શબ્દ ન હતા ઘરાના આ પ્રશ્ન માટે.

અંતે આકાશ અને ધરાના ધૂમધામથી લગ્ન થયા. નિયમિત પરેજી અને સ્વાસ્થ્યની દરકારને લીધે બહુ ટુંકા સમયમાં આકાશ 90% રિકવર થઈ ગયો. આફતના વંટોળ સમી રહ્યા હતા ત્યા જ આકાશ ને ધરાના પ્રેમની કસોટી લેવા જ જાણે કોરોના આવ્યો. જોતજોતામાં કોરોના મહામારી ને લીધે લોકડાઉન આવતા આકાશ ને ધરાની નોકરી છૂટી ગઈ. ધરા અને આકાશ પર આફતના વાદળો બંંધાયા પણ એ ક્યાં કોઈ આફતમાં તૂટી જાય તેવા ન હતા.

તે તો ધરા હતી ! તેમણે આકાશને પણ તૂટવા ન દીધો. બંને સાથે મળીને જીવનની આ મુશ્કેલીઓના વંટોળને પ્રેમમાં પરિવર્તિત કરી દીધું. આ સમયમાં તેમણે જંતુનાશક નામે પેસ્ટ કન્ટ્રોલ અને સેનિટેશનનો વ્યવસાય શરૂ કર્યો.ધરા એ પોતાના દાગીના પર ગોલ્ડ લોન લીધી ને આકાશને આર્થિક રીતે નબળો પડવા ન દીધો. ધરાએ આકાશને પૂરતો સાથ અને સહકાર આપ્યો. ધરા એ પણ ઘરે માસ્ક બનાવવાનું કામ શરૂ કર્યું. બંનેના સહિયારા પ્રયાસથી તેનો બિઝનેસ સારો ચાલવા લાગ્યો. તેને ખૂબ જ સારું વળતર પણ મળ્યું અને તેમનો ધંધોને પ્રેમ વધુને વધુ મહેકવા લાગ્યા. આકાશનો ધંધો ખુબ જ સારો જામી ગયો..

આમ ધરાને આકાશના જીવનમાં તકલીફો ને મુશ્કેલીઓના વંટોળ તેમના પ્રેમ અને લાગણીની સામે ટકી ન શકયો. તેમના જીવનમાં ફરી પ્રેમ હુંફ અને લાગણી એમ જ સદાયને માટે ખીલી રહી. પ્રેમ પરિવારની હુંફ બની મહેકવા લાગ્યો. ને જોતી જોતામાં તેમાં સુકોમળ કુંપળ રૂપી ભુલકાની કિલકારીઓ પણ ગુંજવાના સમાચાર મળી ગયા.

આજે આપણે સમાજમાં છાશવારે દિલ બેસતા અને ન ફાવે તો બીજા દિવસે બ્રેકઅપ કરતા હજારો યુવાનો અને યુવતીઓને જોઈએ છીએ. ત્યારે ખરેખર પ્રેમ, લવ,લાગણી સંબંધ આ બધા શબ્દો પરથી વિશ્વાસ ઉઠી જાય છે, પરંતુ ધરા અને આકાશ જેવા સદાય પ્રેમ, લાગણીથી જોડાયેલા પ્રેમના વાસંતી સ્વરૂપને જોઈએ ત્યારે ખરેખર સમજાય કે સાચો પ્રેમ શું હોય છે !

ખરેખર! પ્રેમની સાચી મહેક તો ખરા અને આકાશના ઉદાહરણ દ્વારા જ આપણને મળી રહે છે.