પડઘો

પહેલી તારીખ સોસાયટીની સફાઈ કરતી કમરી માટે ખુશીનો દિવસ. કેડની નાનકડી પોટલીનો સ્પર્શ કરતા બોલી; 'એ પગાર આલજો..' 

'કૃતાર્થ બેટા, કમરીબેનને પૈસા આપી દે તો.'

રવિવાર રજાનો દિવસ છતાં ઓફિસ ચાલુ રાખતા કૃતાર્થ સવારથી જ અકળામણમાં છે ! તેણે પચાસ રૂપિયાની નોટ કમરી સામે ધરી.

'અરે...ભાઈ, નોટ ચૂંથી નાંખી... આતો લ..ક્ષ..મી !'

'હા..હા..હવે પકડો ને નીકળો અહીંથી.. સલાહ આપવા નીકળી પડ્યા તે ઈડિયટ..' 

*  *. *

'મિસ. લેખી તમે ઈ-મેઈલ ચેક કર્યો ? તમે લોકો આખો દિવસ શું કરો છો ? કોઈને જાતે કામ કરવું નથી પણ એક બીજાને સલાહ આપવી છે. ઈ... ડિ.. ય.. ટો' બોસ આજે ગુસ્સામાં હતો.

  લેખી નતમસ્તકે કેબિનમાંથી બહાર નીકળતા જ:

'કૃતાર્થ, તારું મગજ ક્યાં ભમે છે ? તારા કારણે મારે ઠપકો સાંભળવાનો.

'પણ.. મેમ..!'

'હવે મને સલાહ આપ્યા વિના પેલો ઈ-મેઈલ કરેક્શન કરી રિ-ફોરવર્ડ કર... આ ક્યાં મારે લમણે ભટકાયા..ઈ.. ડિ.. ય…ટ ! ' કૃતાર્થની પાછળ શબ્દો પડઘાય રહયા છે !

તે સાથે જ સવારનો તેનો પડઘો કાને અથડાયો.. 'ઈ.. ડિ... ય.ટ..!'