વાંચી શકો

લાગણીને હૂબહૂ શું શબ્દમાં ઢાળી શકો ?

દિલ લખો પણ કાગળે ધબકાર શું લાવી શકો !

સ્પર્શ કેવળ સ્પર્શ નહિ પણ લાગણીની વાત છે,

ફૂલની નાજુક કળી પર ઓસને વાવી શકો ?

લાગણી સાથે રમત રમવી નહીં ક્યારેય પણ,

આગ એવી લાગશે જે ના કદી ઠારી શકો !

પ્રેમનો રસ્તો કઠિન છે, પામવું સહેલું નથી,

સાવ ખુલ્લા પગ કરી શું આગ પર ચાલી શકો ?

તો પછી માનું, કરો છો પ્રેમ સાચા અર્થમાં,

જો તમે વરસાદમાં પણ આંસુઓ વાંચી શકો !

પ્રેમમાં તડકો વિરહનો સહી શકો જો સ્મિતથી,

તો તમે પણ પાંપણે ચોમાસું બોલાવી શકો.

બસ, શરત છે એટલી કે પ્રેમ હોવો જોઈએ,

ચાંદ જેવા ચાંદને પણ આભથી લાવી શકો.

શું ? વહાવી દઉં બધું ? યાદો નથી પણ શ્વાસ છે,

ફૂલમાંથી શું તમે સુગંધને કાઢી શકો ?

જે કરામત મા કરે છે, આવડે છે કોઈને ?

સુખના છે કે દુખના છે ! આંસુ અલગ તારી શકો ?