તમે ક્યાં છો ?

ભૂતળ આખું ફરી વળ્યો, હરિ તમે ક્યાં છો ?

સંતસમાજે જઈ ભળ્યો, હરિ તમે ક્યાં છો ?

કરી યાત્રા પગપાળા તીર્થધામની મન મૂકીને,

અંતરથી કેવું ખળભળ્યો, હરિ તમે ક્યાં છો ?

દાનદક્ષિણા આપી જરૂરતમંદને યથાશક્તિ,

પાપાચારથી પરત ફર્યો, હરિ તમે ક્યાં છો ?

ઉપવાસ, એકટાણા, નિર્જળા એકાદશી કરી,

તીર્થોદક પામીને હું ઠર્યો, હરિ તમે ક્યાં છો ?

ના મળી ભાળ મને પરમેશની ક્યાંય કદીએ,

ને પછી કેટલો બળાપો કર્યો, હરિ તમે ક્યાં છો ?

ત્યાં તો અંતરે ઊઠ્યો અવાજ હતો હરિતણો,

હું તો તારા રોમેરોમે ભર્યો, હરિ તમે ક્યાં છો !

શોધ થઈ મારી પૂરી, મનમંદિરે વસે હરિવર,

પછી કદી ન સવાલ પૂછ્યો, હરિ તમે ક્યાં છો ?