સરદારનું ગીત-૧૮

રચનાકાર્યારંભ (ઈ.સ. ૧૯૧૯)

ચૂંટાયા ચૂંટણીમાં છે, નવા નવા યુવાન રે;

થયો વલ્લભભાઈનો, પક્ષ છે બળવાન રે.

અસહકાર મંડાયો, દેશમાં જોરદાર રે;

હચમચી ગઈ તેથી, અંગ્રેજ સરકાર રે.

અમદાવાદ શાળામાં, અંકુશ ફગવાય રે;

ને સરકારની ગ્રાન્ટ, લેવાનું બંધ થાય રે.

ખેંચ શહેરમાં ખૂબ, પાણીની વરતાય રે;

યોજના સર્વગ્રાહીનો, ધીમો વિચાર થાય રે.

ખૂંચે વલ્લભભાઈને, ગતિ ગોકળગાય રે;

યોજના અમલી માટે, તલપાપડ થાય રે.

બોર્ડમાં કરવા જાય, ઠરાવને પસાર રે;

કરે અમલદારો ત્યાં, તોછડો વ્યવહાર રે.

કલેકટર પાસે આ, મોકલ્યો છે ઠરાવ રે;

કામ થૈ જાય તાકીદે, એવો દીધો સુઝાવ રે.

કલેકટરની રાયે, યોજના ફેરવાય રે;

ઉનાળો આવ્યો તોયે, કામ કશું ન થાય રે.

વાયદા સરકારીમાં, આધાર ન રખાય રે;

હવે વલ્લભભાઈથી, વિલંબ ન સહાય રે.

નિષ્ણાતો ખાનગી પાસે, લેવા જાય સલાહ રે;

વ્યવસ્થા છે કરી એવી, થૈ’ ગઈ વાહવાહ રે.

ગિરદી કરવી ઓછી, એવું આવેલ કામ રે;

એક પ્લાનિંગ કાબેલ, જેનું મિરેમ્સ નામ રે.

તેમણે નકશા સાથે, યોજના છે કરેલ રે;

રિલીફરોડ માટેની, યોજના સૂચવેલ રે.

જેથી ભીડ રિચીરોડે, ઓછી કરી શકાય રે;

ઠરાવ યોજનાનો આ, જલ્દી પસાર થાય રે.

કલેકટરની ટીકા, અ’છાજતી ગણાય રે;

તેથી તે ખેંચવા પાછી, તેને પત્ર લખાય રે.

**

અસહકારનો જ્વાળ, ફેલાયો પૂરજોશમાં;

કૂદ્યા વલ્લભભાઈ તો, આવીને ખૂબ હોંશમાં.

(ક્રમશ)