મા’રે સ્કૂલે જાવું છે

નોંધ: આ કવિતા અમારી સ્કૂલ નાં પ્રાથમિક ધોરણનાં વિદ્યાર્થીઓના દ્રષ્ટિકોણથી લખવાનો પ્રયાસ કર્યો છે. લોકડાઉન દરમ્યાન દરેક વિદ્યાર્થીનાં મનમાં આ વિચાર આવ્યો હશે. ઘણા વિદ્યાર્થીઓ ઓનલાઈન ક્લાસ દરમ્યાન કહેતા પણ હતા કે સર અમારે સ્કૂલે આવવું છે.

ખાસ નોંધ: કવિતાને થોડો મોડર્ન ટચ આપવા જાણી જોઈને અમુક અંગ્રેજી શબ્દોનો ઉપયોગ કર્યો છે. આશા રાખું છું સૌને ગમશે. 

મા'રે સ્કૂલે જાવું છે, મા'રે સ્કૂલે જાવું છે;

મિત્રો સાથે હળી-મળીને રમવા જાવું છે,

મા'રે સ્કૂલે જાવું છે, મા'રે સ્કૂલે જાવું છે,

મિત્રો સાથે મોજ કરવા, સાથે બેસી નાસ્તો કરવા;

એક બીજાના ડબ્બામાંથી બ્રેકફાસ્ટની લિજ્જત લેવા,

કલાસરૂમમાં સાથે બેસી, જમવા જાવું છે,

મા'રે સ્કૂલે જાવું છે, મા'રે સ્કૂલે જાવું છે,

કોઈ દિવસનાં ઝગડો કરતાં, એક-બીજાને પ્રેમ કરતાં;

સ્કૂલબસમાં પાછળ બેસી, દિવસભરની વાતો કરતાં,

મિત્રો સાથે સ્ટેબેક કરી હોમવર્ક કરવું છે,

મા'રે સ્કૂલે જાવું છે, મા'રે સ્કૂલે જાવું છે,

ટીચર કોઈ દિ' ના ખીજવાતા, અમને જોઈને હરખાતાં;

કલાસરૂમમાં ભણતર સાથે, જીવનનું પણ ઘડતર કરતાં,

સૌને વ્હાલા ટીચર પાસે, ભણવા જાવું છે,

મા'રે સ્કૂલે જાવું છે, મા'રે સ્કૂલે જાવું છે.